“Nuk ka oligarkë në Shqipëri që të marrë vendime për llogari të qeverisë dhe nuk ka në Shqipëri ndonjë që të më detyrojë mua apo qeverinë që të marrim vendimin që shkon në interes të tij dhe dëm të interesit publik”.
Kështu ka deklaruar nga Korça kryeministri Edi Rama, sipas të cilit oligarkët janë kontribuesit më të mëdhenj në ekonomi, punësim dhe buxhet.
“Të pasurit në Shqipëri para se ne të vinim në qeveri paguanin më pak taksa dhe ky është fakt. Ata kishin taksë të sheshtë njësoj si furrat e bukës në Korçë dhe taksohen 15 %.
Në këto 7 vjet hapësira publike është shumëfishuar. Ka shumë më tepër aktorë në treg sesa kishte dje. Duhen marrë oligarkët në thonjëza duhet parë se çfarë kanë dhënë e çfarë kanë marrë, por këta janë punëdhënësit më të mëdhenj të Shqipërisë, mbajnë në punë dhjetëra mijëra njerëz.
Janë kontributorë të drejtpërdrejt në buxhetin e shtetit, financohen edhe shkollat edhe shtëpitë e rindërtimit dhe e fundit, këta janë aktorë në kushtet e Shqipërisë që qeverisim ne, thjesht dhe vetëm kanë kontribuar kur është fjala për projektet e partneritetit publik-privat dhe përfituesi është publiku në radhë të parë”, tha Rama.
Dhe në këtë kontekst kreu i qeverisë shprehet se këtu është bërë propagandë e shfrenuar kundër PPP e koncesionet:
“Por çfarë është? Është marrja nga sektori privat i një investimi që shteti nuk ka mundësi ta bëjë në një hark të shkurtër kohe dhe kthimi i këtij investimi në vite dhe ofrimin e shërbimit.
Marrim check up që nuk është aktiv që nga fillimi i pandemisë, por ka luajtur rol të madh në verifikimin e gjendjes shëndetësore pa asnjë pagesë.
Qindra mijëra njerëz e kanë bërë falas. investimi është bërë menjëherë dhe shteti e paguan mbrapsht dhe kjo është marrëdhënie e natyrshme interesash, por nuk rëndohet xhepi i qytetarit sepse paguan shteti”.
Rama shigjetoi opozitën për taksën e sheshtë, pasi sipas tij kjo taksë favorizon të pasurit dhe jo të varfërit:
“Më të pasurit kontribuojnë më shumë tani. Vjen pala tjetër që thotë 9 % taksa e sheshtë. Është për të pasurit, jo për të varfërit.
Nuk i duhet popullit, por atyre që janë më të pasur oligarkët do marrin mbi 50 mln euro në vit të cilat sot i fusin në buxhet si taksë.
Kaq e thjeshtë është. Problemi i madh është hendeku mes fakteve e shifrave dhe perceptimeve nga propaganda e dizinformimit dhe nga ajo që njerëzit janë të prirur për të besuar të gënjeshtrën më shumë se të vërtetën”, tha Rama.
