Caktimi i Tritan Shehut si drejtuesi politik i Partisë Demokratike në qarkun Gjirokastër nuk është vetëm problem përsa i përket rezultatit tjetër negativ që PD-ja do të marrë në rang qarku, por tregon edhe njëherë standardet që Lulzim Basha shkel në raport me partinë. Tritan Shehu është një prej kandidatëve të skualifikuar nga komisioni i seleksionimit të kandidatëve në PD apo le të themi një lloj komisioni “vettingu”. Ai komision e eleminoi nga gara Shehun si kandidat jo të përshtatshëm.
Ndërkohë Basha hedh në kosh vendimin e atij komisioni që e kërkoi vetë dhe iu dha besim absolut duke caktuar sot Tritan Shehun që t’i prijë Partisë Demokratike për zgjedhjet e treta radhazi. Deri më tani ka humbur dy palë zgjedhje në qark. Ato të vitit 2015 dhe 2017. Të 2019 nuk morën pjesë dhe dihet si shkoi historia. Humbja e radhës që do të koleksionojë Tritan Shehu janë zgjedhjet e 25 prillit. Demokratët që nuk e thonë këtë gjë, por ulin kokën me shpresën se mbase PD vjen në pushtet, i bëjnë dëmin më të madh opozitës. Ne e kemi thënë këtu e para 5 viteve që Tritan Shehu është një mjek shumë i mirë, por një politikan i dështuar dhe që i përket një epoke tjetër. PD-ja e sotme nuk mund të ringrihet kurrë me Tritan Shehun.
Ai dhe të ngjashmit e tij s’mund të jenë kurrë ‘fytyra e re’ e Lulzim Bashës si alternativë më e mirë se PS-ja. Me politikanë si Tritan Shehu, Edi Rama qëndron në pushtet për vite me radhë. Nuk kemi ndonjë merak të madh qëndron apo jo Rama në pushtet, por pse të katandisej PD-ja në këtë derexhe. Dhe këtu përgjegjësia është plotësisht e Lulzim Bashës. Ka ardhur koha që në Shqipëri të ngrihet një opozitë e re përballë Edi Ramës. Sytë drejt Vetëvendosjes! PD-ja e Lulzim Bashës me alternativa si Tritan Shehu s’mund të jetë më opozitë në këtë vend pas 25 prillit.
©argjiroja.net