Pas bërjes publike të skandalit me Ansamblin e Dropullit, i cili është tërhequr minutat e fundit nga koncerti në hapjen e Sheshit Skënderbej në Tiranë, ka ende paqartësi rreth ngjarjes. Fillimisht është raportuar se ansambli është tërhequr me kërkesë të deputetit Vangjel Tavo, por ky e fundit e mohoi përfshirjen dhe akuzoi ashpër drejtorin e policisë Gjirokastër, si dhe Artemisa Dralo. Kandidatja e PS-së reagoi gjithashtu duke akuzuar direkt Vangjel Tavon për terrorizimin që i ka bërë fëmijëve të Ansamblit të Dropullit.
Dralo tha se drjetuesi i këtij ansambli, Anton Tuni e ka pohuar telefonatën me Tavon për tërheqjen nga koncerti në Sheshin Skënderbej. Deri më tani, dy personat që heshtin për këtë ngjarje janë Anton Tuni dhe drejtori i Policisë Gjirokastër, Lorenc Paganika, i akuzuar direkt nga Tavo. Nuk dihet ende nëse do të ketë një reagim prej Tunit dhe Policisë Gjirokastër.
Më së paku Ansambli i Dropullit duhet të japë një shpjegim publik përse u tërhoq minutat e fundit nga pjesëmarrja në koncert?
Burime jo zyrtare thonë se për këtë rast është nisur një hetim dhe pritet të merret në pyetje Anton Tuni, si dhe të zbardhen tabulatet telefonike, për të vërtetuar nëse ka qenë apo jo Vangjel Tavo, që i ka kërkuar Tunit tërheqjen e Ansamblit të Dropullit nga koncerti në hapjen e Sheshit Skënderbej. Hetimi po zhvillohet për të provuar dëshmitë e dhëna pjesëmarrës në Ansamblin e Dropullit, të cilët kanë thënë se janë urdhëruar të fikin telefonat dhe të largohen nga Tirana pasi u rrezikohet jeta.
Mendohet se tërheqja e këtij ansambli, mund të jetë bërë për të respektuar qëndrimin zyrtar të Athinës, e cila ka reaguar për faktin se në Sheshin Skënderbej ka pllaka guri nga Çamëria, konkretisht nga Filati. Nesër pritet të ketë zhvillime të tjera rreth kësaj ngjarje, e cila ndikon jo pak fushatën elektorale në qarkun Gjirokastër.
/ArgjiroLajm.net/
