Nga Kristaq Begzo
Të bësh biznes në Shqipëri nuk është thjesht e vështirë por është e pamundur. Barbarët e tatimeve dhe të Kadastrës janë më të rrezikshëm se ata që i kanë emëruar në ato zyra. Quhem Kristaq Begzo, lindur në Pogon të Gjirokastrës. Fryma e re qeverisëse pas diktaturës më gjeti 26 vjeç. Kisha moshën më të mirë për të punuar dhe kontribuar në vendin tim. Arsyet ekonomike më detyruan që të mos i përballoja dot vitet e tmerrshme të pas 90-tës. Firmat piramidale, lufta civile, pasiguria e jetës dhe punësimi i pagarantuar më shtyn të emigroja në shtetin fqinj të Greqisë. Pasi punova për disa vite u ktheva në vendin tim për të nisur një investim apo biznes. Hendeku i parë ishte certifikata e pronësisë. Pronën që kërkoja ta blija apo administroja e kishin në vartësi dy a tri pronarë të tjerë. Në Kadastër nuk gjeje dot zgjidhje. Provova disa herë por dështoja që pa nisur investimin, pikërisht për parregullsi të dokumentacioneve.
Përpjekjet e mia ishin të vazhdueshme por vjedhësit e xhepave të qytetarëve te veshur me poste në administrata kërkonin rryshfet në mënyrë të hapur. Nuk njihja të fortë të zonës, nuk njihja politikanë, nuk isha militant partia dhe as nuk kisha para mjaftueshëm për të mbushur xhepat e drejtuesve të tatimeve, Kadastrës apo Qendrës Kombëtare të Biznesit. Kjo dukuri ndodh edhe sot. Qindra biznese gjobiten pa të drejtë nga administrata dhe militantët që e drejtojnë atë. Një qytetar e ka të pamundur të investojë për shkak të presionit, shantazhit dhe gjobëvënies. Këtu nuk ka siguri tregu, nuk ka as mbrojtje institucionale. Institucionet janë të dobëta ndërsa drejtuesit e tyre të fortë. Kjo do të ndryshojë.
Ndaj jam bërë pjesë e Nisma Thurje, për t’i dhënë fund shantazhit dhe gjobëvënies së bizneseve. Për të ndihumar sipërmarrësit e rinjë, për të mbështetur investimet vendase dhe ato të huaja. Unë dua që tre djemtë e mi të rriten këtu më Gjirokastër, bashkë me mua dhe bashkëshorten time. Nuk mund t’ja lëmë vendin dhe ekonominë të njejtave fytyra e të njejtave parti që po sundojnë për 30 vite.
Alternativa e re krijon besueshmëri, krijon rrezik për ata të cilët e mbajnë pushtetin me forcë dhe lëkund balancat e prish pazaret politike që bëhet në sallën ku miratohen ligjet për jetën e qytetarëve. Votuesi duhet dhe do ta ketë në dorë fatin e deputetëve. Ne synojmë rikthejmë fuqinë tek qytetarët, të cilët mund të pengojmë përmes referendumeve lokale apo kombëtare çdo padrejtësi që u bëhet sot. Ne kërkojmë që përmes projektligjeve tona pushtetarët të jenë të dobët, institucionet të forta dhe qytetarët vendimmarrës në jetën dhe shoqërinë e tyre.
