Gjykata e Krimeve të Rënda ka shpallur fajtor 22-vjeçarin Halil Shyti nga Tepelena, i cili akuzohet për plagosjen e një efektivi të Policisë. Sipas vendimit të Gjykatës, Shyti u gjet fajtor për veprën penale “Vrasja e punonjësve të Policisë së Shtetit”’, mbetur në tentativë dhe dënimin e tij me 16 vjet burgim. Po ashtu, i riu u deklarua fajtor për kryerjen e veprës penale të “Kultivimit të bimëve narkotike”, duke u dënuar me 4 vjet burgim. Gjykata e ka gjetur fajtor të riun edhe për veprën penale “Vjedhja e energjisë elektrike” dhe dënimin e tij me 6 muaj burgim. Në total, 22-vjeçari u dënua me 18 vjet burgim, por për shkak të gjykimit të shkurtuar, i riu do të vuajë përfundimisht 12 vjet burg. Ndërkohë, para togave të zeza, i pandehuri Halil Shyti ka shprehur pendesë të thellë për kryerjen e këtyre veprave penale dhe ka kërkuar mëshirë nga Gjykata për të dhënë një dënim sa më të butë.
Ngjarja
Halil Shyti, 22 vjeç, u gjykua nga Krimet e Rënda për sulmin ndaj policisë verën e vitit të kaluar, gjatë një aksioni antikanabis në fshatin Krahës të Tepelenës. Gjithçka ka nisur pas zbulimit të një lidhjeje të paligjshme të energjisë që përdorej për pompat e ujit në 4 parcela me drogë. Gjatë këtij operacioni, njëri nga efektivët, Adriatik Hoxha është ndeshur përballë me Shytin, i cili pasi e ka kërcënuar ka qëlluar menjëherë me çifte në drejtim të tij. Efektivi i policisë është ulur në gjunjë, duke vendosur dorën para fytyrës dhe nga e shtëna e armës ai u plagos në trup nga katër saçma. Halil Shyti kërkoi gjykim të shkurtuar që në seancën e parë të gjykimit të tij.
Ai pretendonte se ishte i punësuar nga një bashkëfshatar i tij për të ruajtur parcelat e mbjella me kanabis. Në funksion të hetimeve, gjykata ka dhënë masën e arrestit në mungesë ndaj Albano Ramajt ende i kërkuar nga policia. Ka dyshime se ai ishte pronari i parcelave me 1300 rrënjë kanabis dhe kishte punësuar aty edhe dy pjesëtarë të familjes Shyti. Për plagosjen e efektivit të policisë, i riu është shprehur se ishte në efektin e drogës, ndërsa përjashtoi bashkëpunimin me persona të tjerë. Në këtë ngjarje u arrestua edhe Luan Shyti, babai i 22-vjeçarit. Gjykata e Krimeve të Rënda ka shpallur moskompetencën, pasi nuk rezultoi të ketë qenë i pranishëm në vendngjarje./shekulli
