Në muajin shtator vendi nuk do të ketë vetëm një qeveri të re, por edhe shumë ndryshime në administratën publike, përfshi këtu nivelet e rëndësishme drejtuese.
Sa i përket qarkut Gjirokastër, mund të ketë ndryshim edhe të Prefektit. Burime jo zyrtare, thonë se Rama do të shkarkojë nga kjo detyrë ish-kryebashkiakuan Flamur Bime, për të emëruar në vend të tij Artemis Dralon, kandidate për deputete në listën e PS-së.
Gjatë fushatës elektorale Flamur Bime ishte i distancuar nga aktivitetet partiake. Kjo jo për hir të pozicionit të tij si Prefekt sesa për shkak të hatërmbetjes me Ramën që e la jashtë listës së kandidatëve për deputetë të PS-së.
Megjithatë shkarkimi i tij i mundshëm nga posti i Prefektit të qarkut, nuk është se lidhet me ndonjë ‘hakmarrje’ të Ramës ndaj tij, sesa me synimin e Kryeministrit për t’i dhënë një tjetër dinamikë administratës publike, duke përfshirë në qeverisje figura të reja e të pakonsumuara. Sidoqoftë duhet të presim shatorin për të mësuar ndryshimet.
/ArgjiroLajm.net/
