Milinkoviç i kërkon Tavos largimin, Luftëtari në gjurmët e tre talenteve

Luftëtari i sezonit të ri pritet të marrë formë në javët e ardhshme, kur klubi të zyrtarizojë stafin teknik dhe afrimet që ka piketuar.

 

Vetëm tre lojtarë janë konfirmuar deri më tani si të larguar, pikërisht Vangjel Zguro, Usama Mutumane dhe Edi Nikolas Bojom.

Mirëpo, e gjithë pjesa tjetër e grupit është nën kontratë dhe klubi vendos për të ardhmen e gjithsecilit lojtar.

 

Deri në mbyllje të merkatos, drejtuesit e Luftëtarit mund të konkretizojnë shitjen në një klub jashtë Shqipërisë të Dejvi Bregut dhe Kristal Abazajt, por deri më tani nuk ka asgjë konkrete, edhe pse ofertat nuk kanë munguar.

Gjatë kësaj periudhe, drejtuesit bluzi kanë punuar në heshtje sa i përket merkatos, duke u fokusuar te disa talente në gjithë Shqipërinë. “Panorama Sport” mëson se prej javësh kanë nisur bisedimet me 17-vjeçarin e talentuar beratas, Aldrit Oshafi.

Bëhet fjalë për një mesfushor me shumë perspektivë. Njëkohësisht, në objektivat e Luftëtarit mbeten edhe mesfushorët Xhulio Mehmeti dhe Jugers Liçkollari, të cilët mbyllën sezonin me Kamzën dhe Pogradecin.

TRAJNERI – Mlladen Milinkoviç është gjithnjë e më larg Luftëtarit. Burime të sigurta në klubin bluzi bën të ditur për gazetën se trajneri serb u ka kërkuar drejtuesve mbylljen e dokumentacionit.

Pra, me kontratën që ka përfunduar, Milinkoviç kërkon lejen e kalimit nga klubi, në mënyrë që të quhet trajner i lirë, pa asnjë detyrim ndaj Luftëtarit. Presidenca bluzi nuk ka dalë ende me një qëndrim për Milinkoviç, i cili, sipas të gjitha gjasave, do të vazhdojë karrierën te Partizani.

TOMOR SHEHU