Sot është dorëzuar në polici një nga tre të dyshuarit si agresorë të avokatit 39-vjeçar Marjel Mejdi (Mejdini) njëkohësisht dhe anëtar dhe funksionar i niveleve të ulëta në Partinë Demokratike të Sarandës. Personi që është dorëzuar është Aleks Rexha nga Gjirokastra, ndërsa është ndaluar menjëherë nga policia. Ai ishte shpallur në kërkim së bashku edhe me shtetasit E.F dhe S.N, për veprat penale “Plagosja e rëndë me dashje”, kryer në bashkëpunim, “Prodhimi, mbajtja, blerja apo shitja pa leje e armëve të ftohta” dhe “Shkatërrimi i pronës”. Ngjarja për kujtesë ndodhi më 5 korrik në afërsi të Portit të Sarandës. Pasi 39-vjeçari doli nga kafja ku ishte ulur, ata e goditën dhe më pas i dëmtuan makinën. Marjel Mejdi u transportua në spitalin e qytetit me plagë të rënda dhe fraktura në krahun e djathtë dhe në këmbën e majtë. Gjatë një deklarate pas ngjarjes, Mejdi tha se Aleks Rexha nga Gjirokastra ishte një ndër personat që xhaxhai i tij kishte konflikte.