Një ndër erëzat mjaft të njohura është kthyer në mundësinë më të mirë për banorët e fshatit Xherie në Cërrik. Rigoni prodhohet me shumicë në këtë fshat aq sa banorët kanë menduar që të shpallin festën e Rigonit.
Jo vetëm kaq por banorët kanë shpikur edhe mënyrën se si ta përpunojnë.
Pajisja konsiston në vendosjen e një rrjete si kazan e cila lidhet me një bosht qendror që fiksohet në dy këmbë. Brenda rrjetës hidhet rigon i papërpunuar dhe rrjeta e set duke nxjerrë rigon të pastër.
Ky inovacion i vitit është duke u përhapur gjerësisht dhe tashme fermerët kanë zbritur në treg për të kërkuar rrjeta dhe elementë të tjerë që formojnë pajisjen e thjeshtë.
Duke mos pasur mundësi për të pasur teknologji, më të vjetrit i kanë thirrur përvojës duke arritur në këtë zgjidhje.
Rigoni është një bimë mjekësore që mbillet gjerësisht në këto fshatra në pamundësi për të mbjellë kultura të tjera. Me këtë bimë ata sigurojnë të ardhura minimale. Por gjithsesi nuk mbeten pa gjë fare.
Xherija prodhon rreth 100 ton rigon në vit. Me këtë rast bashkia Cërrik në bashkëpunim me Drejtorinë e Bujqësisë dhe do të organizojnë ditën e premte një panair në këtë fshat ku do të shpërndahen certifikata për prodhuesit më të mirë. Natyrisht që shpikja e njërit prej fermerëve meriton një çmim të veçantë.
Problemi i vetëm i banorëve tani për tani është gjetja e tregut të shitjes. Me rritjen e prodhimit ka rënë çmimi duke demoralizuar prodhuesit e shumtë të rigonit këtë vit./konica.al
