Kryeministri Edi Rama ka njoftuar se kabineti i ardhshëm qeveritar do të jetë më i vogël se ky ekzistuesi.
Deklaratat i bëri gjatë një dëgjese publike në qytetin e Durrësit. Por ai nuk dha më shumë detaje se cilat ministri do të shkurtohen.
Nuk dihet gjithashtu nëse do të ketë në kabinetin e ri qeveritar ndonjë prej deputetëve të Gjirokastrës. Gjatë katër viteve të shkuara, deputetë të zgjedhur të qarkut Gjirokastër zunë vend në kabinetin ‘Rama’.
Kujtojmë Erion Veliajn si ministër i Mirëqënies Sociale dhe Rinisë, si dhe Arben Ahmetajn ministër i Ekonomisë dhe më pas ministër i Financave. Por edhe në kohën e qeverisjes së PD-së, kishte deputetë të Gjirokastrës në kabinetin qeveritar, si Genc Ruli e Spiro Ksera.
Duhet pritur muaji shtator për të parë konfigurimin e kabinetit të ri qeveritar.
“Në fillim të shtatorit do të jemi gati me blloqet e mëdha duke filluar nga qeveria e re, që do të jetë më e vogël, më eficente dhe patjetër, do të ketë kapacitetin për të garantuar bashkëqeverisjen. Nuk do të ekzistojnë më ministri dhe agjenci që nuk begenisin t’i lexojnë dhe jo t’u kthejnë përgjigje njerëzve”, u shpreh sot kryeministri Rama.
Në zgjedhjet e 25 qershorit PS mori në Gjirokastër 3 mandate deputetësh dhe do të përfaqësohet në Kuvend me Bledi Cucin, Mirela Kumbaron dhe Flamur Golemin.
/ArgjiroLajm.net/
