Luftëtari është i vetmi ekip i Kategorisë Superiore që ende nuk ka kryer asnjë seancë stërvitore në funksion të sezonit të ri futbollistik. Për herë të fundit, gjirokastritët kanë zbritur në fushë në ndeshjen përmbyllëse të kampionatit, më 27 maj, ku fituan në shtëpi 1-0 ndaj Kukësit, duke u shkaktuar kampionëve humbjen e vetme në 36 javë.
Që nga ajo ditë, Luftëtari vijon pushimet, të cilat kanë rezultuar të gjata. Thuhet se fillimi i punës për sezonin e ri do të nisë më 20 korrik. Këtë periudhë të gjatë pushimi po e shijon edhe “arkitekti” i Luftëtarit, trajneri Mladen Milinkoviç, i cili është i përkushtuar me disa punë të tija personale.
“Panorama Sport”, para disa ditësh u mundua të kontaktonte përmes mesazheve telefonike me trajnerin serb, për të mësuar rreth të ardhmes së tij, pasi përveç Luftëtarit është përfolur edhe Partizani. Gjithsesi, trajneri Milinkoviç i është përgjigjur mesazhit të gazetës, ku tregon edhe situatën e tij.
“Më vjen keq që nuk ju jam përgjigjur në kohë, por telefoni që ka numrin shqiptar nuk e përdor dhe gjatë këtyre ditëve kam qenë i zënë me disa punë të mija te shtëpia. Gjithsesi, mund të sqaroj se nuk ka asnjë zhvillim sa i përket të ardhmes sime. Ndaj, po shikoj këto pushimeve verore”, u shpreh fillimisht trajneri serb.
I harruar nga presidenti Tavo Shefi i klubit të Luftëtarit, Gentian Nora, në një prononcim të para disa ditëve, deklaroi se gjirokastritët e kanë trajnerin e tyre për sezonin e ri dhe ai do të jetë Mladen Milinkoviç. I pyetur rreth këtij fakti, 49-vjeçari pohoi për “Panorama Sport” se nuk ka asnjë kontakt me presidentin që nga muaji maj.
“Sa i përket Luftëtarit mund të them se kam kontakte vetëm me shefin e klubit Nora, ndërsa me presidentin nuk kam asnjë kontakt që nga maji. Kanë kaluar thuajse 45 ditë që ai nuk më ka telefonuar. Madje, presidenti Tavo nuk ka kontaktuar as agjentin tim, kështu që nuk besoj shumë te rikthimi në Gjirokastër.
Nëse ai më telefonon, jam i gatshëm të bisedoj, por nuk e di nëse do të mund të gjejmë marrëveshjen për sezonin e ri. Kështu që nuk kam pse të nxitohem. Ata i dinë kushtet e mia prej kohësh”, u shpreh Milinkoviç. Ndërsa, i pyetur se në çfarë faze janë bisedimet me Partizanin, trajneri serb u shpreh: “Me këtë pistë është marrë agjenti im. Nuk e di nëse palët janë ende në bisedime, pasi ka disa ditë që nuk kam folur me agjentin tim”.
