IKMT vijon shembjen e ndërtimeve pa leje në Radhimë

Inspektoriati Kombëtar i Mbrojtjes së Territorit vijon shembjen e ndërtimeve pa leje në bregdet në kuadër të operacionit “Bregdeti Ynë”. Njësoj si përgjatë fundjavës edhe sot, fadromat e IKMT ishin në Radhimë për prishjen e objekteve që janë evidentuar pa leje apo në tejkalim flagrant të lejes së ndërtimit. Disa herë për këtë operacion, ministri i Brendshëm, Bledi Çuçi, ka thënë se nuk kemi të bëjmë thjesht me një aksion, por me një punë sistematike që do të vazhdojë në të gjithë bregdetin dhe në zona të tjera të vendit për të liruar çdo hapësirë të zaptuar nga ndërtimet pa leje. Në fazën e parë të operacionit “Bregdeti Ynë” që nisi në muajin qershor u shembën mbi 130 ndërtime pa leje, u vendosën rreth 132 milionë lekë gjoba për 86 subjekte, si dhe u arrestuan e u ndoqën penalisht dhjetra persona. Operacioni u ndal në fund të qershorit për shkak të sezonit turistik dhe rifilloi në shtator.