Që prej orës 17:00 të pasdites së sotme po mbahet në ambientet përpara kryeministrisë një protestë kundër rritjes së çmimeve të ushqimeve të shportës dhe të çmimit të energjisë elektrike. Në fjalën e tij përpara protestuesve, aktivisti Adriatik Lapaj i bëri thirrje shqiptarëve të bashkohen masivisht në tubime, për interesin e tyre dhe jo për interesat e partive politike.
Lapaj u shpreh se fatkeqësia e një kombi është kur bijtë e tij më të mençur, të cilët janë intelektualët, e shesin shpirtin në kurriz të fermerëve dhe personave në nevojë.
“Përshëndetje! Kisha vendosur të mos flisja, se besoj se protesta është individuale, por fjala që po mbajnë qytetarët tregon sinqeritetin e kësaj proteste.
Ndoshta nuk është më e bukura në fjalime, por është një protestë e sinqertë. Ky vend ka nevojë të dëgjojë pa zbukurime, pa makiazh të vërtetën e popullit të vet ashtu siç e preceptojnë. Kam disa pyetje për ju:
A keni mundësi të paguani për rritjen e çmimit të energjisë?
“Jo”- u përgjigjën protestuesit.
A keni mundësi për rritjen e çmimit të bukës?
“Jo”- u përgjigjën protestuesit.
A keni mundësi për rritjen e çmimit të gazit?
“Jo”- u përgjigjën protestuesit.
A keni ju të ardhura për të jetuar me dinjitet?
“Jo”- u përgjigjën protestuesit.
Të dashur vëllezër, ne sot këtu duhet të ishim më shumë. Hallet tona mund të zgjidhen vetëm duke u bërë barrikadë. Duke i thënë jo rritjes së çmimit të bukës, duke i thënë jo rritje të çmimit të karburanteve, duke i thënë jo rritjes së çmimit të energjisë elektrike.
Për të gjithë ata miliona që na shohin nga ekrani kam disa pyetje për ta:
Sa do duroni? A nuk u ngopët? A nuk ja patë hajrin servilizmit? A nuk u ngopët që fëmijët që po ju ikin?
Për çfarë nuk po ngriheni, që ata të bëjnë pushime në Maldive dhe në vendet më të shtrenjta të botës?
Që një pjesë e kësaj republike të ketë shtëpi në Tiranë, shtëpi në bregdet, shtëpi në Vlorë, shtëpi në Milano dhe shtëpi në Paris.
Fatkeqësia e një kombi është kur bijtë e tij më të mirë, që janë intelektualët që e shesin shpirtin në kurriz të fermerëve, në kurriz të invalidëve dhe fëmijë që enden rrugëve të botës. Boll më për interesat e partive të kryetarëve, kthehuni tek interesi tuaj“, tha Lapaj.
