Pfizer i kërkoi qeverisë amerikane të enjten të lejojë përdorimin e vaksinës së saj kundër COVID-19 tek fëmijët e moshës 5 deri në 11 vjeç – dhe nëse rregullatorët bien dakord, vaksinimi mund të fillojë brenda disa javësh.
Shumë prindër dhe pediatër po kërkojnë mbrojtje për fëmijët nën 12 vjeç, mosha e sotme kufi për vaksinën e bërë nga Pfizer dhe partneri i saj gjerman BioNTech. Jo vetëm që të rinjtë ndonjëherë mund të sëmuren rëndë, por qëndrimi i tyre në shkollë mund të jetë një sfidë me koronavirusin që ende po shtrihet në komunitetet e vaksinuara dobët.
Pfizer njoftoi në një mesazh në Tëitter se kishte paraqitur zyrtarisht aplikimin në Administratën e Ushqimit dhe Barnave.
Tani FDA do të duhet të vendosë nëse ka prova të mjaftueshme se vaksinat janë të sigurta dhe do të funksionojnë për fëmijët më të vegjël si për adoleshentët dhe të rriturit. Një panel ekspertësh i pavarur do të debatojë publikisht mbi to më 26 tetor.
Një ndryshim i madh: Pfizer thotë se hulumtimi i tij tregon se fëmijët më të vegjël duhet të marrin një të tretën e dozës që tani u jepet të gjithëve. Pas dozës së tyre të dytë, fëmijët 5 deri në 11 vjeç zhvilluan nivele të antitrupave që e luftojnë virusin po aq sa adoleshentët dhe të rinjtë marrin nga dozat e rregullta.
Ndërsa fëmijët janë në rrezik më të ulët nga sëmundjet e rënda ose vdekjet sesa njerëzit e moshuar, COVID-19 ndonjëherë vret fëmijë dhe rastet tek të rinjtë janë rritur me shpejtësi pasi varianti Delta shumë ngjitës ka përfshirë vendin.
