Një erë e pakëndshme që del nga lavatriçja pas përfundimit të larjes është një problem i zakonshëm në shumë familje. Shkaku nuk është domosdoshmërisht ndonjë defekt teknik, por shpesh lidhet me zakonet e përditshme dhe mungesën e mirëmbajtjes së pajisjes.
Sipas revistës amerikane “Good Housekeeping”, një nga gabimet më të zakonshme është mbyllja e derës së lavatriçes menjëherë pas heqjes së rrobave. Kjo pengon tharjen e lagështirës së mbetur brenda kazanit dhe gomës së derës, duke krijuar kushte për zhvillimin e mykut dhe baktereve.
Një tjetër problem është grumbullimi i detergjentit dhe papastërtive në gomën rrethuese të derës, ku mund të mbeten edhe ujë, fibra rrobash dhe objekte të vogla.
Përdorimi i tepërt i detergjentit gjithashtu mund të përkeqësojë situatën, pasi mbetjet e tij grumbullohen në kazan dhe në tubat e pajisjes, duke shkaktuar aroma të pakëndshme.
Për të shmangur këtë problem, rekomandohen disa veprime të thjeshta:
Lëreni derën e lavatriçes pak të hapur pas çdo larjeje, në mënyrë që të thahet pjesa e brendshme.
Pastroni rregullisht gomën e derës, ku mund të grumbullohen papastërti dhe myk.
Mos përdorni më shumë detergjent sesa sasia e rekomanduar.
Pastroni periodikisht sirtarin e detergjentit dhe zbutësit.
Aktivizoni programin e posaçëm për pastrimin e kazanit, sipas udhëzimeve të prodhuesit.
Kontrolloni dhe pastroni filtrin e pompës së kullimit sipas manualit të pajisjes.
Nëse aroma vazhdon edhe pas këtyre veprimeve, problemi mund të lidhet me sistemin e kullimit dhe mund të kërkojë kontroll nga një teknik.
Ekspertët theksojnë se mirëmbajtja e rregullt jo vetëm që eliminon aromat e pakëndshme, por ndihmon edhe në zgjatjen e jetëgjatësisë së lavatriçes dhe në përmirësimin e cilësisë së larjes.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
