Zgjerohet rrethi i personave të përfshirë në çështjen e kultivimit të kanabisit në Përmet. Policia ka vënë në pranga kryeplakun e Frashërit Klodjan Mustafa, 43 vjeç. Arrestimi i tij u pasua me një tjetër veprim nga ana e Prokurorise së Përmetit, e cila vendosi masën e sigurisë “detyrim paraqitje” për inspektorët e Policisë se zonës së Frashërit Dhimitër Shyti dhe Maltin Dalilaj.
Masa e sigurisë “detyrim paraqitje” është vendosur edhe për inspektorin e Zonave të Mbrojtura në Permet Joan Allamani. Të gjitha këto veprime ndaj uniformave blu janë ndërmarrë pas sinjalizimeve nga SHÇBA Vlorë.
Kjo është shoqëruar po dje me pezullimin nga detyra deri në sqarimin e rrethanave të shefit të Komisariatit të Përmetit Petrit Gjokaza, ndërsa mbahet në “arrest shtëpie” ish-shefi i krimeve të Komisariatit të Përmetit Shpëtim Makashi. Në vend të Gjokazës është komanduar Vilson Dine, shefi aktual i Policise Kriminale në Përmet.
Parcela me kanabis fundosi policinë
I gjithë aksioni i ndërmarrë në Përmet mësohet se ka lidhje me zbulimin e një parcele me rreth 500 rrënjë kanbis në zonën e Frashërit nga SHÇBA. Hetimi për parcelën ka nisur pas indicieve të marra se në këtë fshat në shtator të këtij viti ishte kultivuar kanabis. Hetimi 2 mujor zbuloi lidhjen e drejtuesve lokalë të policisë së Përmetit me trafikantë të drogës.
