Të tjera detaje kanë dalë për ngjarjen tragjike që ndodhi ditën e sotme në Ksamil, ku një 16-vjeçare ruse u mbyt në det.
Pasi trupi i saj është dërguar në morgun e spitalit, mjekët kanë konstatuar dy plagë, një në bërryl dhe tjetra në shpatullën e majtë.
Edhe pse është ende herët për të dalë në konkluzione, dyshimet e policisë janë se adoleshentja ruse mund të jetë përplasur me ndonjë shkëmb, ose është goditur me ndonjë motor uji.
Ndërsa, lidhur me këtë ngjarje, policia ka vënë në dije edhe ambasadën ruse në vendin tonë.
Informacioni paraprak nga policia
Më datë 21.07.2017, rreth orë 13:00, njoftohemi nga shërbimet e policisë kufitare se në Ksamil është mbytur një shtetase.
Policia është afruar menjëherë në vendngjarje dhe ka konstatuar se tek vendi i quajtur ”3 Ishujt” Ksamil, Sarandë, është gjetur e mbytur një vajzë e cila pas hetimeve paraprake dyshohet të jetë shtetase Ruse, rreth moshës 16-17 vjeçare.
Po punohet për gjeneralitetet e plota. Trupi i saj po dërgohet drejt Spitalit Sarandë për veprimet e mëtejshme hetimore.
