Mbrëmjen e shkuar një çift të moshuarish në Dropull humbën jetën pasi banesa e tyre u përfshi nga flakët. Për shkak të largësisë dhe rrugës së keqe, shërbimi zjarrfikës nuk mund të mbërrinte më herët me shpresë se mund t’u shpëtonte jetën. Si për ironi të fatit, disa orë përpara ngjarjes, Bashkia Dropull kishte shpërndarë disa foto në faqen e saj, ku shihen pajisje të reja që iu dhuruan shërbimit zjarrfikës nga një shoqatë.
Natyrisht që nuk është faji i bashkisë për ngjarjen që ndodhi në Hllomo, as i shërbimit zjarrfikës që me aq kapacitete që ka bën çfarë mundet. Realiteti është i trishtë në shumicën e fshatrave të Dropullit dhe mbarë vendit.
Mungojnë shërbimet bazë në infrastrukturë, shëndetësi e le më pastaj të ketë edhe shërbim zjarrfikës të lokalizuar edhe nëpër njësi administrative që të mund të shkojnë më shpejt në fshatrat ku ndodhin emergjenca si ajo e mbrëmshmja. Në këto raste vlen të thuhet shprehje që ilustron dështimin dhe pafuqinë tonë si shtet për të siguruar disa shërbime bazë: Zoti ju ruajt! ©argjiroja.net
