Skandali i publikimit të pagave të qytetarëve është thelluar akoma më shumë, pasi ditën e sotme një tjetër listë është bërë publike.
Bëhet fjalë për listën e pagave të shqiptarëve për muajin prill 2021, ndërsa dy ditë më parë u publikua lista për muajin janar.
Edhe lista e muajit prill duket të jetë në format e ngjashme me atë të parën, e eksportuar në programin “Exel”. Aty jane te publikuar ID, emri dhe mbiemri, paga e punes, pozicioni dhe vendi ku punon.
Lista e re ka mbi 694 mijë punonjës, rreth 60 mijë më shumë se lista e pare. Lista doli në të njëjtën kohë kur kryeministri Edi Rama po mbante një konferencë për këtë çështje.
Rama e dënoi këtë veprim, duke i kërkuar ndjesë të gjithë shqiptarëve. Sipas kryeministri publikimi i këtyre të dhënave është bërë qëllimisht për të krijuar konfuzion dhe destabilitet.
“I kërkoj ndjesë të gjithëve që janë shqetësuar me të drejtë për këtë ndërhyrje në këtë aspekt të jetës së tyre privat dhe dua ta nënvizoj se kjo është një ngjarje e cila meriton të hetohet imtësisht., Uroj dhe i bëj thirrje organeve të drejtësisë që ta kryejnë këtë hetim me të gjitha kapacitetet.
Dua ta ndaj me publikun se në këndvështrimin tim nuk është e vështirë të shohësh se këtu ka një qëllim jo fort të vështirë për tu kuptuar dhe krijuar konfuzion dhe për të nxitur destabilitet në një përpjekje që nuk është e para.
Thirrja ime për prokurorinë është që të hetojë duke kërkuar që të përgjigjen jo vetëm të gjithë inspektorët e tatimeve që kanë akses në sistemin e pagave për arsye të punës.
Ata që aktualisht punojnë në këtë sistem apo të tjerë që janë larguar në këtë sistem, por edhe ata që nga foltoret e kuvendeve dhe anatikuvendet”, tha Rama.
