Nga Mentor Kikika
Fotoja e parë tregon pastrimin e plazheve nga algat dhe leshterikët që ka sjellë deti. Fotoja e dytë tregon punëtorë të një bashkie që po largojnë mbetjet e një vendgrumbullimi të paligjshëm, diku në një fshat.
Fotoja e katërt tregon sërish punëtorë të një bashkie që pastrojnë mbeturinat përgjatë rrugës automobilistike.
Në foton e tretë është një kamion që shpërndan ujë të ambalazhuar.
Lidhur me të parën: Një Zot e di pse pastrohet në Janar plazhet nga këto mbetje që deti i dimrit i sjell sërish brenda 24 orëve dhe kur sezoni turistik hapet në Maj.
Lidhur me të dytën: Banorët e fshatrave, edhe pas këtij pastrimi, do të vazhdojnë ti hedhin mbeturinat përgjatë përrenjve, lumejve, pyjeve e ferrave, nëse nuk ka kazanë.
Lidhur me të tretën: Rrugët do të vazhdojnë të ndoten, derisa nga makinat të vazhdohet të hidhen sende që i dalin “tepër” shoferëve e pasagjerëve. Lidhur me të katërtën: E fotografova unë sot në mëngjes, tek rrethrrotullimi Saukut në Tiranë. Nga dera e pasagjerit të këtij kamioni u hodhën në rrugë një tufë mbeturinash; Nja dy gota kartoni kafeje, kartopeceta, një bidon uji bosh…
Unë, me qindra vullnetarë, çdo vit pastrojmë plazhet në pranverë për të ndihmuar përgatitjen e sezonit. Bëjmë këtë, sepse kaq kemi në dorë të bëjmë, kaq mundemi. Por qeveria nuk duhet të mjafohet me kaq. E denoncova publikisht këtë kamion, pasi nëse qeveria do të bëjë vetëm show, duke nxjerrë pastruesit nëpër rrugë dhe nuk do të prodhojë mekanizma për të ndëshuar këta që i ndotin rrugët, kjo nuk ka snjë kuptim. Gjobiteni këtë kamion(modelin e ndotjes e kam fjalën) , dhe s’ka nevjoë për punëtorë përgjatë rrugëve. Shqipëria nuk pastrohet vetëm duke u pastruar, por më shumë duke mos u bërë pis. Aksioni për pastrimin vazhdon dhe është i dobishëm gjithësesi.
