Klubi gjirokastrit i Luftëtarit është në krizë ose së paku në kaos, ndonëse drejtuesit mundohen ta mbajnë të fshehtë këtë situatë. Katër ditë më parë zëdhënësi Rigels Malile në një komunikim me mediat konfirmoi vazhdimin serbit Milinkoviç si trajner i Luftëtarit edhe për sezonin e ri futbollistik.
Madje sipas tij kontrata e rinovuar ishte mbyllur që në muajin prill. Ndërkohë sot në një tjetër dalje për media, Malile foli për grumbullimin e ekipit nën drejtimin e kapitenit, por për trajnerin tha se do të vendoset ditën e hënë dhe se kontrata nuk është mbyllur 100%.
‘Me mundësinë më të madhe do të jetë ai që mbylli sezonin, Milinkoviç, por në pritje mund të ketë edhe ndonjë surprizë’, tha Malile.
Deri më tani i vetmi që nuk ka folur për këtë çështje është vetë trajneri serb, i cili nuk ndodhet as në Gjirokastër. Fillimisht pati zëra për një kalim të tij te Partizani dhe së fundi te Kukësi.
Mbetet për t’u parë se çfarë do të ndodhë në javën e ardhshme te klubi gjirokastrit, por klima nuk është e mirë brenda ekipit.
Është raportuar gjithashtu edhe për probleme me pagesat e futbollistëve, si dhe për një tërheqje të mundshme të presidentit Grigor Tavo nga klubi.
Ditët e ardhshme do të jenë vendimtare për Luftëtarin, i cili pretendon këtë sezon të jetë në 4 klubet e para.
/ArgjiroLajm.net/
