Gjashtë persona janë dënuar me gati 40 vjet burg për trafikim të kokainës në Dorset të Britanisë së Madhe. Autorët ishin pjesë e një grupi të krimit të organizuar, i përbërë kryesisht nga shtetas shqiptarë, të cilët lehtësonin grumbullimin e kilogramëve të drogës së klasit A nga Londra. Kokaina u soll në zonën e Bournemouth për t’u shitur në sasi më të vogla. Një operacion i gjerë nga Policia e Dorset bëri që gjashtë të pandehurit të përballeshin me drejtësinë në gjykata.
Autorët u paraqitën në Gjykatën e Kurorës së Bournemouth për t’u dënuar të premten, më 11 shkurt, lidhur me furnizuar me drogë të klasit A.
Ardit Zani, 29 vjeç dhe nga Bournemouth, Andrew Doyle, 31 vjeç dhe nga Christchurch, Lawan Najim, 26 vjeç dhe nga Bournemouth, dhe Marjus Nona, 23 vjeç dhe nga Birmingham, të gjithë më parë kishin deklaruar fajësinë për akuzën në seancat e mëparshme.
Agron Bendaj, 54 vjeç dhe nga Luton në Bedfordshire, u shpall fajtor pas një gjyqi në qershor 2021 dhe Endri Kostreni, 29 vjeç nga Bournemouth, u dënua pas një gjyqi të mëtejshëm në nëntor 2021. Kostreni u shpall fajtor edhe për furnizimin e një droge të klasit B. Zani u dënua me tetë vjet burg, Bendaj u dënua me shtatë vjet burg dhe Najimi u burgos me gjashtë vjet. Kostreni u dënua me dhjetë vjet, Doyle u burgos me pesë vjet e pesë muaj dhe Nona u dënua me tre vjet e katër muaj burg.
Si u kap grupi kriminal
Në qershor të vitit 2020, detektivët nga Ekipi i Hetimit të Krimit të Organizuar të Policisë Dorset nisën një hetim mbi aktivitetet e grupit të krimit të organizuar, të cilët u raportuan se ishin të përfshirë në furnizimin në shkallë të gjerë të drogës së klasit A në zonë.
Provat e marra gjatë operacionit treguan se të pandehurit ishin pjesë e një rrjeti të përfshirë në lehtësimin e grumbullimit të kokainës në sasi të mëdha nga Londra dhe më pas t’i çonin ato në zonën e Bournemouth për t’i shitur në sasi më të vogla.
Operacioni kulmoi me një ditë aksioni të enjten, më 29 tetor, ku efektivët ndaluan një automjet në të cilin u gjet një bllok i madh kokaine, me peshë më pak se një kilogram dhe arrestuan një numër të pandehurish.
Najim u arrestua teksa tentoi të largohej nga automjeti dhe Doyle gjithashtu u arrestua aty pranë. Pas kontrolleve në zonë u gjetën dhe u ndaluan edhe Zani dhe Bendaj.
Një seri mandatesh u ekzekutuan më pas në një numër adresash në Bournemouth dhe oficerët gjetën disa mijëra paund në para të gatshme, si dhe sasi të ndryshme kokaine, me vlerën totale të drogës së sekuestruar që vlerësohet midis 58,360 dhe 127,710 £.
Ostreni u arrestua pasi u gjet në një nga adresat që u kontrolluan. Gjithashtu u konstatua se ai merrej me kultivimin e kanabisit. Nona u arrestua në Birmingham të martën, më 6 prill.
