Në orët e para të mëngjesit të sotëm ka ndodhur një aksident në afërsi të tunelit pranë rrugës së re për në Sarandë përmes urës së Kardhiqit.
Nga informacionet paraprake bëhet e ditur se një automjet ku po udhëtonin tre turistë shqiptaro-amerikanë ka dalë nga rruga. Si pasojë, ata kanë pësuar dëmtime, por mësohet se janë jashtë rrezikut për jetën.
Nga hetimet e deritanishme, dyshimet janë se tre turistët kanë ngatërruar rrugën për shkak të mungesës së sinjalistikës.
Nga ana tjetër, policia ndodhet në vendin e ngjarjes dhe po punon për të sqaruar rrethanat e saj.
Policia e Gjirokastrës/ Informacion paraprak
Rreth orës 08:05, në aksin rrugor Kardhiq-Delvinë, në rrugën dytësore, në vendin e quajtur ‘Qafa e Skërficës’, mjeti tip ‘Hynday’, me drejtues shtetasin A. A., 60 vjeç, banues në Berat, ka dalë nga rruga.
Për pasojë është dëmtuar drejtuesi i automjetit dhe dy pasagjeret, shtetaset M. A., 50 vjeçe dhe Xh. A., 21 vjeçe, banuese në Berat, të cilët u transportuan në spitalin Rajonal Gjirokastër për të marrë ndihmën mjekësore, jashtë rrezikut për jetën.
Në vendngjarje ndodhet grupi hetimor dhe po punon për zbardhjen e shkaqeve të aksidentit.
