E paprecedentë në Greqi! Një 50-vjeçar shqiptar ka rrëmbyer vajzën e tij 22-vjeçare, pasi kjo e fundit kishte një lidhje me një 37-vjeçar, lidhje dashurie për të cilën familja nuk ishte dakord.
Sipas denoncimit, babai 50-vjeçar së bashku me djalin e tij 21-vjeçar, kanë kryer rrëmbimin e 22-vjeçares, në bashkëpunim me një shok. Mediat greke raportojnë se dy burrat së bashku me një shok të tyre, pasditen e së dielës kanë dalë me makinë në rrugët e Kypselit dhe pas kërkimeve e kanë gjetur atë duke ecur bashkë me të dashurin e saj. Më pas babë e bir e kanë marrë vajzën me forcë dhe e kanë hipur në makinë.
Fill pas këtij episodi, babë e bir e futën në një apartament të nëndheshëm në Kaosariani.
Ata ishin kujdesur t’i merrnin celularin 22-vjeçares, në mënyrë që ajo të mos mund të kërkonte ndihmë ndërkohë që e kishin mbyllur në apartament dhe më pas tentuan ta bindin për orë të tëra që të hiqte dorë nga dashuria e saj.
Skena zgjati deri mëngjesin e së hënës kur vajza kërkoi të shkonte në tualet dhe arriti të kërkonte ndihmë, shkruan Protothema.
Pak minuta më vonë në vendin e ngjarjes mbërriti policia, e cila çoi pas hekurave babë e bir dhe shokun e tyre.
