Një zjarr i ndezur qëllimisht nga një i ri pranë fushës së grumbullimit të mbetjeve urbane në Gjirokastër është bërë shkak për replika në distancë mes Partisë Demokratike dhe kryebashkiakut Flamur Golemi. PD akuzon bashkinë se zjarri në plehrat është vënë qëllimisht nga punonjësit e bashkisë
“Ja se si shembet fasada e pushtetit të korruptuar në Gjirokastër. Vetë punonjësit e bashkisë Gjirokastër u kanë vënë zjarrin mbeturinave në lagjen Gërhot duke ndotur në mënyrë kriminale mjedisin dhe duke rrezikuar dhe jetën e banorëve përreth”, thotë PD në një deklaratë.
Kryebashkiaku Flamur Golemi i është përgjigjur teksa ndodhej në Cepo bashkë me forca të shërbimit zjarrfikës për shuarjen e një tjetër zjarri.
Ai thotë se policia ka proceduar zjarrvënësin te fusha e grumbullimit të plehrave dhe se zjarri është shuar në kohë.
“Kush thotë se i ndezim vetë zjarret se s’kemi çfarë iu bëjmë plehrave, është vërtet i çmendur dhe mashtron me vetëdije. 😃 Ka një kohë shumë të gjatë që Bashkia Gjirokastër nuk asgjëson mbetjet urbane me djegie, por falë investimit që kemi bërë me mbështetjen e qeverisë gjermane, bëjmë trajtimin e tyre me kapsulim pa shkaktuar ndotje për qytetin“, shkruan Flamur Golemi.
