Dy viktimat e atentatit të kësaj të enjteje në Vlorë, të identifikuar si Shpati Lena rreth 37 vjeç, dhe Hakim Xhezo, 34 vjeç, i njohur si “Bushi”, kanë qenë të përfshirë në një vrasje të ndodhur në gusht të vitit 2019 në Plazhin e Vjetër Vlorë.
Vëllai i Hakim Xhezos, Eduart Xhezo, është aktualisht në burg pasi akuzohet si autor i vrasjes së Arben Beqirajt, i njohur ndryshe si “Arbeni i Çeçesë”. Në të njëjtën ngjarje kanë mbetur të plagosur djali i viktimës dhe një i afërm i tij. Konflikti i atëhershëm ka nisur pasi një kalë ka kaluar gjatë ditës mes plazhistëve në zonën që administrohej nga Arben dhe Ergest Beqiraj.
Babë e birë kanë dhunuar personin që ishte mbi kalë dhe ai më pas është larguar.
Një orë me vonë ka mbërritur në zonë një makinë me katër persona.
Dy prej të cilëve janë afruar për të diskutuar dhe dy të tjerë në distancë pasi ka nisur konflikti verbal kanë shtënë në drejtim të Arben Beqirajt, të birit Ergest Beqiraj dhe kushëririt të tyre Nesim Hodaj.
Pas disa orësh Arben Beqiraj ndërroi jetë në spital. Viktima nuk rezultonte me precedentë të mëhershëm penalë, ndërsa i biri, Ergest Beqiraj, ka qenë i përfshirë në plagosje me armë të ftohta në 2018-ën dhe ka qenë i dyshuar si autor i vendosjes së eksplozivit në lokalin e Brikelo Brahimaj.
Si ndodhi ngjarja në 2019
Gazmend Alushi, i cili paguhej 100 mijë lekë të vjetra në muaj nga Ermal, allias Eduart Xhezo për kujdesin ndaj kalit të tij, është dhunuar me grushte e shkelma në 4 gusht 2019 nga Arben Beqiraj, djali i tij dhe persona të tjerë familjarë që ndodheshin në lokal.
Gazmend Alushi e kishte nxjerrë shëtitje kalin në plazh, teksa Arben Beqiraj është bezdisur nga zhurma e kalit dhe pasi ka debatuar me Alushin e ka goditur këtë të fundit.
Fill pasi ka shpëtuar nga rrahja, Gazmendi ka shkuar në banesën e tij, ku aty i kishte shkuar Ermali duke e pyetur se kush e kishte rrahur, dhe Alushi i ka pohuar se ishte dhunuar nga “Arbeni i Çeçesë”.
Fill pas kësaj, Ermal Xhezo, ka mobilizuar shokët e tij si Shpati Lena dhe kunatin e tij Ariel Kingji, ku të gjithë janë armatosur me automatikë dhe pistoleta, duke shkuar në ambientet e lokalit të Arben Beqiraj, për t’u sqaruar lidhur me rrahjen që ata i kishin bërë kujdestarit të kalit të Ermal Xhezos.
Teksa kanë shkuar për tu sqaruar, janë ulur 3 minuta në një tavolinë dhe më pas kanë nisur përplasjet fizike deri në përdorimin e armëve, duke sjellë vrasjen e Arben Beqirajt dhe plagosjen e djalit të tij dhe Nesim Hodaj.
Kjo ngjarje tronditi qytetin e Vlorës në pikun e sezonit turistik, ndërkohë që personat e përfshirë në këtë ngjarje kriminale u arrestuan nga policia.
