Një protestë do të mbahet sot kundër ardhjes së dy anijeve që mbartin dy supergjeneratorë me naftë të rëndë që sipas qeverisë shqiptare do të sigurojnë energji elektrike për vendin. Ambientalisti i njohur Lavdosh Feruni është në krye të asaj proteste me thirrjen “Nuk e japim Vlorëm”. Por, cilat janë dëmet e jashtëzakonshme që këta TEC-e lëvizëse i sjellin Vlorës?
Lavdosh Ferruni, në një artikull e ka shpjeguar me detaje:
“Nuk e japim Vlorën” është slogani i protestës në mëngjesin e 9 shtatorit të qytetarëve të Vlorës e thirrur nga Aleanca per Mbrojtjen e Gjirit të Vlorës.
Në kohët moderne ndodh shpesh që një territor lëshohet jo nga pushtimi ushtarak, por nga pseudozhvillimi, ku shumëkombshet e naftës janë në avanguard të këtij lloj pushtimi.
Rast tipik është pushtimi i hapësirës për 99 vjet i 18 hektar nga Petrolifera në Gji të Vlorës, pushtim që po synon në fshehtësi të zgjerohet prej dhjetra hektarë të tjera. Gjoja për të ndihmuar për krizën energjitike nga Qeveria, duket me një ujdi paraprake dhe me shumë fshehtësi, po i jepet një kompanie nafte i gjithë Gjiri i Vlorës.
Janë 2 platforma mbi të cilën janë instaluar super gjeneratorë, që do djegin 600 ton naftë të rëndë për të prodhuar 100 MWh energji elektrike, e barabartë me 5% të kapacitetit të instaluar në Shqipëri.
Përveç një superndotje për gjithë Vlorën shqiptarët do duhen të paguajnë rreth 700 milion EUR për 2 vjet, para me të cilat mund të sigurohen nga energji e rinovueshme shumëfish i këtij kapaciteti dhe me një përdorim 30 vjeçar.
Bilanci është: Vlora merr ndotjen dhe paguan milionat, kompania, apo konsorciumi merr fitimet marramendëse. Por 2 vjeçari i vuajtjes është vetëm fillimi. Kompania e naftës do marri qindra e mijra miliona të tjera për 30 a më shumë vjet nga instalimet e veprave të tjera foisile, TECe, terminale etj, në territorin tashmë të pushtuar pjesërisht, pushtim që do zgjerohet vit pas viti, duke gllabëruar të gjithë gjirin e Vlorës, e duke nxirë detin e qiellin, që do i nxijë dhe jetën banorëve të Vlorës.
Aleanca për Mbrojtjen e Gjirit të Vlorës është një aleancë qytetare me një kontribut të jashtëzakonshëm në kundërshtimin e pushtimit të plotë të Gjirit të Vlorës nga manjatët botëror të naftës në fillim të viteve 2000, sidomos shmangia e e naftësjellësit AMBO, që do shkarkonte dhe ngarkonte 800,000 fuçi naftë në ditë, ndërtimin e 3 TEC-eve etj.
Sidoqoftë ata ja dolën të ngulin 2 gozhdë në Gji të Vlorës, Petroliferën dhe TEC-in e Vlorës, si parapushtim për të ardhur sot me “flotën” nga Bangladeshi, së cilës pritet t’i bashkohen anije fosile-mbajtëse, në vitet në vazhdim, nga e gjithë bota…
Beteja fillon sot. TEC i Vlorës është llogaritur të krijojë ndotje sa deri 100 mijë makina çdo ditë që ecin 100 kilometra. Ndotja skandaloze që po i shkaktohet gjithë vendit është një rrezik serioz edhe për florën dhe faunën e të gjithë zonës.
Shkatërrimi që do i ndodhë zonës nga këto TEC gllabëruese të natyrës së mrekullueshme të Shqipërisë është i madh sepse zona të tëra do të ndoten dhe turizmi nuk do të jetë kurrë më si më parë.
Këto TEC-e rrezikojnë të ketë edhe një dëmtim të përhershëm të natyrës në brigjet më të bukura të Shqipërisë. Ata që do e pësojnë janë qytetarët e vendit pasi pushtetarët që marrin vendime janë kalimtarë dhe nuk ndikohen nga ndotja.
Dëmi që i shkaktohet natyrës është vetëm pë qytetarët e thjeshtë që jetojnë në zonë e jo për ata që edhe pushimet i bëjnë jashtë vendit.”
