Kur çifti kanadez Edith Lemay dhe Sebastien Pelletier mësuan se tre nga katër fëmijët e tyre kishin retinitis pigmentosa, një gjendje e rrallë gjenetike që shkakton humbje të shikimit me kalimin e kohës, ata morën një vendim të rëndësishëm: nisën të bënin një turne botëror me plot “kujtime vizuale”.
Vajza e Lemay dhe Pelletier, Mia, 12, dhe djemtë Colin, 7, dhe Laurent, 5 vjeç, u diagnostikuan me retinitis pigmentosa. Aktualisht nuk ka asnjë kurë apo trajtim efektiv për të ngadalësuar përparimin e gjendjes dhe çifti thekson se fëmijët e tyre mund të jenë “plotësisht të verbër nga mesi i jetës”.
Familja Lemay-Pelletier eksploron pyllin Quivertree në Namibi, ku filluan udhëtimin e tyre botëror.
Për CNN, Lemay tha se kur specialisti i Mia-s rekomandoi që ajo të krijonte “kujtime vizuale”, nëna kuptoi se ekzistonte një mënyrë vërtet e pabesueshme që ata mund të bënin këtë për të dhe për fëmijët e tjerë. “Mendova, ‘Nuk do t’i tregoj asaj një elefant në një libër, do ta çoj për të parë një elefant të vërtetë.
Dhe unë do ta mbush kujtesën e saj vizuale me imazhet më të mira, më të bukura që mundem.”, tha Lemay. Ajo dhe burri i saj shpejt filluan të bëjnë plane për të kaluar një vit duke udhëtuar nëpër botë me fëmijët e tyre. Qëllimi i tyre është të fokusohen në pamjet – kafshët, florën dhe faunën – dhe të përjetojnë gjëra që nuk do të mund t’i bënin në shtëpi.
Djali i çiftit Leo gjatë vizitës së familjes në Kapadokia të Turqisë.
Ata filluan udhëtimin e tyre në Namibi. Më pas, ata u nisën për në Zambia dhe Tanzani, përpara se të zbarkonin në Turqi për një muaj. Familja më pas mori rrugën për në Mongoli, përpara se të shkonte në Indonezi. “Udhëtimi është diçka nga e cila mund të mësosh.
Është e këndshme dhe argëtuese, por gjithashtu mund të jetë shumë e vështirë. Mund të jesh i pakëndshëm. Mund të jesh i lodhur. Ka zhgënjim. Pra, ka shumë që mund të mësosh nga vetë udhëtimi.”, tha Lemay. “Ata përshtaten lehtësisht me vendet e reja dhe ushqimin e ri. Unë jam shumë e impresionuar me ta,” shtoi ajo. Lemay dhe Pelletier thonë se udhëtimi ka forcuar lidhjen midis katër fëmijëve të tyre, të parë këtu në Mongoli.
