MBRETËRI E BASHKUAR- Vdekja e mbretëreshës Elizabeth është kthyer në biznes për shqiptarët. Kështu raportojnë mediat britanike të cilat shkruajnë se bandat shqiptare po përdorin funeralin e Mbretëreshës si një justifikim për të promovuar oferta me zbritje për të kaluar Kanalin Anglez.
Ata po përdorin media sociale si TikTok për të bërë marrëveshje me çmim 1,600 £ për person për çdo emigrant që “dëshiron të marrë pjesë në funeralin e monarkes” duke i nxitur ata ta bëjnë këtë përpara funeralit shtetëror e cila do të zhvillohet të hënën e ardhshme. Reklamat në platformën e mediave sociale kanë imazhe të mbretëreshës me një pallto dhe kapelë ngjyrë vjollce.
Sipas ofertave, shqiptarët mund të marrin familjet dhe fëmijët në udhëtimin 21 milje nëpër ngushticat e Doverit.
Tarifa prej 1600 £ është gjysma e çmimit të marrëveshjeve të mëparshme më të lira të “shitjes verore” që variojnë nga 3000 deri në 5000 £ që ofroheshin nga bandat e kontrabandës së njerëzve dy muaj më parë.
‘Kjo ofertë e veçantë duket se u drejtohet shqiptarëve që kanë zënë 60 për qind të ardhjeve në të gjithë kanalin gjatë verës. Bandat kanë ofruar gjithashtu marrëveshje “fëmijë pa pagesë” në një përpjekje për të inkurajuar familjet që të bëjnë kalimin.’- shkruhet në artikull.
Sipas zyrtarëve të Forcave Kufitare, gjatë garës së fundit të lidershipit konservator, trafikantët paralajmëruan se migrantët duhej të kalonin përpara se të formohej një Qeveri e re me Liz Truss si kryeministre, e cila do të mbante një qëndrim më të ashpër ndaj migracionit.
Truss është zotuar të negociojë më shumë marrëveshje deportimi në stilin e Ruandës dhe të ruajë rolin e Marinës në mbikëqyrjen e funksionimit të kanalit. Ish-sekretari i Jashtëm është zotuar gjithashtu të mbajë një qëndrim më të fortë me Francën për t’i dhënë fund “tregtisë vdekjeprurëse” të kontrabandistëve të njerëzve.
Numri i shqiptarëve që rrezikojnë jetën për të udhëtuar drejt Anglisë për një jetë më të mirë është rritur ndjeshën këtë sezon veror dhe është kthyer në një problem për autoritetet e Britanisë së Madhe. Shifrat zyrtare flasin për mijëra shqiptarë që zgjedhin të blejnë vdekjen me para, paguajnë udhëtimin me gomone nga Franca drejt Britanisë, vetëm që të largohen nga Shqipëria. Vetëm disa ditë më parë Dosja.al publikoi një video të shqiptarëve mbi gomone, të cilëve iu rrezikohej jeta teksa ndodheshin në kanalin mes Francës dhe Anglisë.
/Source/ Burimi: Express.co.uk
