Rruga e fshatit Fushëbardhë është rikonstruktuar plotësisht. Kryebashkiaku Flamur Golemi ka publikuar një video teksa shfaqet bashkë me Ardi Veliun, ish-drejtorin e Policisë së Shtetit dhe ish-zv.ministër i Infrastrukturës për pak kohë. Kujtojmë që Veliu dhe Golemi janë me origjinë vetë nga ky fshat dhe me siguri kanë qenë të interesuar që ky projekt të fillonte e përfundonte.
“Rruga e Fushëbardhës më në fund e transformuar plotësisht, ashtu siç e kanë pritur e merituar banorët e kësaj zone për kushedi se sa vite me radhë. Falë mbështetjes së kryeministrit Rama dhe ministres Balluku sot kemi të përfunduar një tjetër rrugë rurale në bashkinë Gjirokastër, për të ndërlidhur më shpejt jo vetëm banorët e këtij fshati, por edhe për të nxjerr në treg prodhimet e zonës dhe për të nxitur sipërmarrje të reja në agroturizëm. Ta gëzoni!”, shkruan Golemi.
Në pamjet që do shihni më poshtë mungon ende sinjalistika horizontale dhe vertikale e rrugës, por pritet që kjo të kompletohet në javët e ardhshme nga ARRSH. ©argjiroja.net
