Shkrimtari i njohur gjirokastrit Odise Kote, promovoi sot në Tiranë romanin e tij të fundit “Amerikani”. Në Muzeun Kombëtar ishin mbledhur për këtë event autorë të ndryshëm, studiues, gazetarë, miq e të ftuar të shkrimtarit. Në fjalën para të pranishmëve, Odise Kote tha se ka pritur gati 30 vjet për të shkruar këtë roman, ngacmimin për të cilin e ka marrë pikërisht në Gjirokastër nga historia e violinistit të shquar Polo Xhori, i cili ka përjetuar një kalvar të gjatë persekutimi nga regjimi komunist.
“Në thelb unë mendoj se edhe lufta politike edhe regjimet nuk janë gjë tjetër veçse beteja dhe konflikte midis kulturave, midis qytetërimeve. Në këtë kontekst e kam parë të gjithë historinë e romanit. Sigurisht që romani është fiction. I ka të gjitha stilet e shkrimit. Mua më është dashur të kaloj sa nga njëra kohë në tjetrën, për të dhënë të gjithë atë lëndë që do të përbënte romanin. Duke qenë se vij nga gazetaria, mendova që narrative ime të mos ishte një narrativë e stërgjatur, e lodhshme”, u shpreh Kote.
Në vijim të fjalës, shkrimtari shtoi gjithashtu se strukturimi i romanit është bërë duke kaluar nga errësira në dritë.
“Të gjithë personazhet janë kundërthënës me njëri-tjetrin. Dhe nëse unë e kam zhvilluar teatrin e këtij romani në Gjirokastër, kjo vjen për shkakun se Gjirokastra është një qytet që i ka rrafshuar mitin, legjendën, të vërtetën, ngjarjen, faktin, të sotmen, të asaj që do të ndodhë pas 100 vjetësh, 200 vjetësh e me radhë. Kjo ta jep të gjithë atë luks që të operosh shumë mirë në pikëpamje të strukturimit të romanit, për të dhënë ato mesazhe që duhet të themi”, theksoi Odise Kote.
Teksa përshkruan përpjekjet e personazhit kryesor të romanit, Nelson (Nelo) Andrea për të ruajtur shpirtin e tij artistik ndonëse ishte dënuar me 23 vite burgim, Odise Kote shkruan:
“Lahet, ushqehet, vesh jelekun dhe këmishën e bardhë me jaka të larta dhe zbret në kube. Kubeja ishte kisha e tij, ajo kishë si e At Artur Liolinit atje në Boston. Kubeja dhe interpretimi në violinë janë instrumentet që e shndrrojnë Nelo Andrean shqiptar, një varrmihës komunaleje në Nelson Andrean amerikan”.
Gjatë promovimit të librit folën dhe diskutuan mbi veprën, Irena Toçi, botuese e “Toena”, Alda Bardhyli, drejtore e Qendrës Kombëtare të Librit, Dorian Koçi, drejtor i Muzeut Historik Kombëtar, Diana Çuli, shkrimtare dhe Behar Gjoka, kritik dhe studiues letrar. Libri ka dalë në shitje në të gjitha libraritë e vendit. ©argjiroja.net
