Kuvendi i Shqipërisë ka votuar me 97 vota pro për hapjen e dosjeve të Sigurimit të Shtetit. Nga 98 deputetë që ishin të pranishëm në sallën e Kuvendit, 97 votuan pro, një abstenoi, ndërsa kundër nuk pati asnjë votë. Votimi i këtij ligji ka rikthyer edhe ish-kreun e Partisë Demokratike Lulzim Basha. Ai u pa ulur në vendin e tij në momentin që do të zhvillohej votimi, por nuk dihet ende nëse ka qenë personai që ka abstenuar apo edhe ai e ka mbështetur këtë nismë.
Votimit i parapriu një debat të gjatë prej më shumë se 13 orësh në seancë plenare. Grupi që mbështet Enkelejd Alibeajn e deklaruan që pasdite votën e tyre, ndërsa publik në media u bë edhe mesazhi ku Alibeaj u bënte thirrje deputetëve të votonin pro.
“Të nderuar kolegë, Pak më vonë është votimi për ligjin e dosjeve. Amendametet e GP te PD u moren parasysh nga PS, duke u terhequr nga qëndrimi i mëparshëm i tyre dhe duke siguruar hapjen e plotë të dosjeve dhe deklasifikimin e tyre. Pas aprovimit të të gjitha amendamenteve tona, GP i PD do të votojë PRO projektligjit. Lutem për deputetët që nuk janë prezent në sallë që të vijnë për këtë votim të rëndësishëm, për një çështje që PD e ka patur betejë që nga themelimi i saj,”- thuhej në mesazh.
Kryedemokrati Sali Berisha nuk ishte prezent kur u bë votimi. Vetë kryeministri Edi Rama në fjalën e tij ftoi edhe pjesën tjetër të deputetëve demokratë që të votojnë draftin për të bërë të mundur që edhe personalitetet e larta që kanë marrë një vërtetim për pastërtinë e figurës të mund të verifikohen sërish e tu hapen dosjet. Ai tha se qëllimi është që të zbulohet nëse personi me inicialet I.M., është kreu i Partisë së Lirisë Ilir Meta apo jo.