Luftëtari i Daniel Fernandez e nis me humbje. Miqësorja e zhvilluar dje në Nausa ndaj ekipit vendës që mban të njëjtin emër, është mbyllur me shifrat 2-0. Përtej rezistencës së gjirokastritëve në 45 minutat e para, e dyta foli për skuadrën e ligës së tretë greke, e cila gjeti dy herë rrjetën. Një muaj nga nisja e përgatitjeve në Gjirokastër dhe vetëm pas dhjetë ditëve qëndrimi në tokën greke, aty ku dhe bluzinjtë do të zhvillojnë sot takimin e radhës me Anagenisi Kardhica, Luftëtari u “thye”. Pavarësisht rezultatit final, skuadra shfaqi cilësi në lojë, veçanërisht në pjesën e parë. Stafi teknik, i cili ka më pak se 20 ditë në krye të bluzinjve, hodhi në fushën e lojës këtë formacion: Ruci, Çunaj, Janku, Toledo, Nasif, Hoxha, Ramadani, Puci, Zogaj, Kasa dhe Ahmetaj.
Me nisjen e ndeshjes, Luftëtari u tregua i kujdesshëm në veprimet mbrojtëse, duke e mbajtur sa më larg kundërshtarin. Skuadra u shfaq e rrezikshme edhe në sulm, po nuk arriti që të ishte konkrete para porte. Më shumë se dëshira për të fituar këtë takim, për trajnerin uruguaian vlerë kishte kondicionit fizik i grupit, pjesë e së cilës në ditët e merkatos së verës janë bërë dhe disa futbollistë të rinj.
Ky fraksion u mbyll pa gol, ndërkohë e dyta rinisi me të njëjtin formacion. Për afro 70 minuta titullarët nuk lëvizën, ndërsa më vonë u futën emra si: Gaba, Ziaj, Beqiri, Qyrhani, Rroca, Nunjez, Aleksi, Lamçe, Bregu e Zeqaj. Skuadra u ndëshkua të 50-ën minutë, ndërsa në të 80-ën Nausa vendosi “vulën” me një tjetër rrjetë.
Presidenti
Grigor Tavo viziton ekipin. Presidenti ishte dje i pranishëm në Nausa për të qenë pranë Luftëtarin. Ai ndoqi edhe ndeshjen miqësore, ku ekipi i tij u mposht. Mbrëmë nuk qëndroi në Veria, megjithatë gjasat janë që edhe sot të mos mungojë ndeshjen e radhës testuese, me shpresën që ekipi të gjejë edhe fitoren./panoramasport
