Në prezantimin e projekteve të Ministrisë së Turizmit për vitin 2023, ministrja e këtij institucioni Mirela Kumbaro ka bërë të ditura disa prej synimeve të kësaj ministrie.
Një theks të rëndësishëm në projektet e Ministrisë së Turizmit e zë dhe ekonomia qarkulluese.
Sipas ministres Kumbaro, në qarqet e Gjirokastrës dhe të Kukësit do të investohet në menaxhimin e integruar të mbetjeve për një pikë fundore.
“Ekonomia qarkulluese është një koncept i ri, i ri dhe i vjetër njëkohësisht, nëpër letra, nëpër ligje, nëpër tekste, nëpër të gjitha konventat ndërkombëtare që ne kemi ratifikuar, është një koncept që është i ndarë, por nuk është publik, nuk ka qenë pjesë e ligjërimit publik fjala mjedis, sepse është një koncept i cili dhe ndërkombëtarisht sot klima, mjedisi, ekonomia qarkulluese, janë terma relativisht të reja.
Në këtë kuptim, ne sapo kemi kryer dhe ka hyrë në fuqi që nga data 1 Janar e këtij viti ristrukturimi i plotë i Ministrisë së Turizmit dhe Mjedisit me një drejtori të dedikuar për ekonominë qarkulluese, që ka të bëjë me përdorimin e 3 R-ve; Ripërdorimin, Riciklimin dhe Reduktimin e mbetjeve në të gjitha aspektet.
Në këtë kontekst, ajo që është interesante janë konceptet edhe të edukimit mjedisor me një sektor të dedikuar në Ministri dhe kjo është arsyeja pse për vitin 2023 fillojmë me dy investime të fuqishme në bashkëpunim me Programet IPA për të pajisur dy qarqe të cilat nuk i kishin investimet në pikat fundore të trajtimit. Se ne flasim për pastërti, por vjen një moment dhe nuk e bëjmë pyetjen gjithë këto mbetje ku shkojnë? Ka nevojë për një pikë fundore në zbatim të strategjisë kombëtare të menaxhimit të integruar të mbetjeve.
Qarku Kukës dhe qarku Gjirokastër do të pajisen, falë këtij investimi me gjithë rrjetin e plotë të pajisjeve deri në trajtimin e pikës fundore. Për qarkun e Kukësit do të ndërtohet në qark, për qarkun e Gjirokastrës të 7 bashkitë pas ndërtimit të rrugës Kardhiq-Delvinë do t’i zhvendosin drejt landfillit të Bajkajt që edhe ai do të ketë pjesën tjetër të investimit”, tha ndër të tjera ministrja e Turizmit Mirela Kumbaro.
