Dy vëllezërit shqiptarë Gramoz dhe Klaudian Karina u arrestuan nga Policia italiane, pasi akuzohen për trafik lëndësh narkotike. Vëllezërit ishin drejtues të një grupi i cili ishte i shpecializuar në blerjen dhe shitjen e kokainës, marijuanës dhe heroinës.
Në pranga, ka rënë edhe kushëriri i tyre Julian Sufali, 33 vjeç, si dhe 36 vjeçari rumun Costantin Dorel Barbu, i cili bënte transportin jashtë rajonit. Gjithashtu u arrestua edhe një 38-vjeçar shqiptar banues në Asti që ishte klient i grupit dhe dy shtetas marokenë të moshës 32 dhe 42 vjeç.
Hetimet kanë nisur që në janar të vitit 2021 kur një grua u arrestua në Carugate pasi iu gjetën 4 kilogramë heroinë dhe 2 kilogramë kokainë, të cilën e kishte për të furnizuar “eprorët” e saj. Pas arrestimit të saj, karabinierët kishin dyshime për furnizues droge në qytetin milanez, që kishin në dorë sasi të mëdha lënde narkotike.
Ata arritën ta lokalizonin banesën e dy vëllezërve shqiptarë, të shndërruar tashmë në një rafineri artizanale në të cilën ndodhej gjithçka qe duhej për përpunimin e drogës dhe përgatitjen e dozave të kokainës. Këto doza më pas shpërndaheshin në sheshet kryesore në qytete të ndryshme të Italisë veriore.
Për transportin e drogës, kujdesej Sufali me një mjet tip Golf, për dërgesat brenda zonës, dhe shtetasi rumun për ato jashtë rajonit. Karabinierët arritën të sekuestronin 40 kg drogë përfshirë hashash, marijuanë, kokainë dhe herionë, si edhe 77 mijë euro. Kur u kryen arrestimet hetuesit gjetën gjithashtu edhe 166 mijë euro të tjera. Një nga të arrestuarit, 32-vjeçari maroken, me banim në Rozzano, bëri sikur nuk ndodhej në shtëpi kur mbërriti policia, por më pas u dorëzua.
