Nuk thonë kot që djalli fshihet në detaje. Nëse i hedh një sy faqes në Facebook të Adrian Gurmës, kryebashkiakut aktual të Sarandës, i cili nuk u rikonfirmua për një mandat të dytë në garën e 14 majit, s’ka asnjë postim të tij në mbështje të Oltion Çaçit.
Formalisht Gurma i uroi suksese në deklaratën e parë kur u zyrtarizua kandidatura e Çaçit. Që prej atij momenti s’ka asnjë postim apo shpërndarje në faqen e tij të aktivitetit të fushës që sapo kanisur Oltion Çaçi. Madje Gurma nuk ka shpërndarë as edhe takimin e Asamblesë së PS-së ku ishte vetë i pranishëm.
Gjuha e trupit flet vetë. Krejt i zymtë e në siklet përpara socialistëve, ai thjesht është fizikisht në atë takim dhe po të ishte në dëshirën e tij dhe ai të ishte një qytetar i lirë, me siguri s’do të kishte marrë pjesë fare. Edhe pse shpresoi deri në fund se mund të rikonfirmohej, Gurma u mënjanua nga drejtuesi politik Blendi Klosi dhe Kryesia e PS. S’ka një shpjegim publik për këtë vendimarrje dhe as vetë Gurma s’ka guxuar të flasë.
Situata për socialistët në Sarandë është ndërlikuar pak pas vendimit të sotëm të KAS, që pranoi regjistrimin e Gjergji Mërkurit si kandidat i pavarur. Mërkuri krijon jo pak “dëm” në radhët e elektoratit të majtë. Veç tij kandidati i PS-së, Oltion Çaçi, ka përballë edhe kandidatin e mbështetur nga grupimi i “Foltores” dhe kandidatin e mbështetur nga fraksioni i vulës në PD. Saranda rezervon një garë interesante në 14 maj. ©argjiroja.net
