Kryeministri Edi Rama ka treguar se i rrëfeu homologes së tij italiane, Giorgia Meloni, episodin e pakëndshëm të ndodhur në qytetin e Beratit me 4 turistë italianë, të cilët u larguan pa paguar faturën.
Në një intervistë për “La Stampa”, kryeministri tha se Meloni i kërkoi ambasadorit italian në vendin tonë, Fabrizio Bucci, që të shkojë të paguajë faturën e katër të rinjve që u larguan nga restoranti në Berat pa paguar.
Më tej kryeministri tha se Meloni porositi Buccin që të paguajë faturën pasi Italia nuk mund të humbasë respektin kështu.
“Në mediat shqiptare dhe në TikTok nuk u fol veçse për një grup italianësh që u arratisën nga një restorant në Berat pa paguar. Pronari e hodhi poshtë. Kur i thashë Giorgias, të gjithë qeshën. Ajo bërtiti dhe urdhëroi ambasadorin: “Shko dhe paguaj faturën për këta budallenj, të lutem, dhe bëj një deklaratë! Italia nuk mund të humbasë respektin kështu”, tha Rama për La Stampa.
Kujtojmë se dy ditë më parë në medie qarkulloi një video ku katër turistët italianë ia mbathnin nga restoranti pa paguar. Nga kamerat e sigurisë së restorantit është kapur momenti kur katër të rinjtë u larguan dhe nuk paguan faturën e ushqimit që konsumuan e cila kishte shkuar 80 euro.
