Dy ditë më parë emisioni “Fiks Fare” denoncoi një masakër mjedisore në Sarandë. Në një pjesë të Liqenit të Butrintit ishin hedhur inerte dhe po kryhej ndërtim pa leje. Askush nga institucionet publike nuk e merrte përsipër përgjegjësinë për këtë krim mjedisor. Inspektoriati i Mbrojtjes së Territorit ia pasonte përgjegjësinë Policisë së Shtetit.
Ndërkohë pas transmetimit të denoncimit në Fiks Fare, mësohet se është vënë në lëvizje IKMT dhe Prokuroria e rrethit Sarandë. Masat nuk janë bërë ende publike, por mësohet se hedhja e inerteve ka nisur që në muajin mars ndërsa ndërtimi pa leje është kryer gjatë gushtit. Askush nuk di të thotë se kush qëndron pas kësaj ndërhyrje të paligjshme.
Eshtë e habitshme sesi ditën për diell në një zonë kaq shumë të ekspozuar, hidhen inerte në Liqenin e Butrinit, që për më tepër konsiderohet edhe si një zonë e mbrojtur, si dhe ndërtohet pa leje e askush nga institucionet shtetërore nuk bën as përpjekjen minimale për ta ndaluar. Më poshtë denoncimi i plotë në Fiks Fare. ©argjiroja.net
