Numri i individëve që nuk janë në marrëdhënie pune dhe kontribuojnë vullnetarit në skemën shtetërore të pensioneve, është rritur me 26.3 % në gjysmën e parë të vitit. Referuar të dhënave zyrtare të Institutit të Sigurimeve Shoqërore, në 6-mujor, në skemë rezultojnë 8830 kontribues vullnetarë, apo 1841 individë më shumë se e njëjta periudhë e një viti më parë. Nga kjo kategori ISSH ka arkëtuar rreth 406 milionë lekë. Megjithatë kontributet vullnetare zënë vetëm 1.1 për qind të totalit të të gjithë skemës.
Ajo që vihet re nga të dhënat është se 26.3 për qind e personave që kanë derdhur kontribut për sigurim vullnetar gjatë kësaj periudhe, jetojnë jashtë vendit, ndërsa pjesa tjetër jetojnë në Shqipëri. Kjo tregon që qytetarët të cilët kanë pasur disa vite pune në Shqipëri dhe janë larguar në emigrim kanë zgjedhur të derdhin kontribute me qëllim që të përfitojnë pension në vendin e tyre. Gjasat janë që ky kontribut të vijë nga emigrantë në shtete ku nuk ka ende një marrëveshje për njohjen e pensioneve, siç janë Greqia apo Italia.
Sipas llojit të marrëveshjes, 52.1 për qind është sigurim vullnetar; 44.3 për qind i takon mbulimit vullnetar të periudhave, në rastet kur një individ nuk ka plotësuar vitet e punës, dhe 3.6 për qind është sigurim për më shumë të ardhura.
Nëse do ti referohemi grupmoshave, 68.6 për qind e përbëjnë individët mbi 50 vjeç, 27.4 për qind individët nga 35-50 vjeç dhe 4 për qind, 18-30 vjeç. Nga 1 Prilli 2023 për shkak të rritjes së pagës minimale në shkallë vendi në 40 mijë lekë, sigurimi vullnetar mujor pësoi një kapërcim prej 1300 lekësh, duke arritur në 8640 lekë apo 103 mijë lekë në vit.
