Kryeministri, Edi Rama, foli në emisionin “Repolitix” në Report Tv në lidhje me marrëveshjen që nënshkroi më 6 Nëntor në Romë për të strehuar emigrantët në Shëngjin.
Rama iu përgjigj kritikave që ka marrë për nënshkrimin e marrëveshjes në fjalë. Ai tha se i vjen për të vjellë kur dëgjon disa që flasin për të zinj e për shkatërrim të racës.
Edi Rama: Më vjen për të vjellë kur ndesh disa që flasin për të zinj e flasin për shkatërrim të rracës e për lloj lloj broçkullash të neveritshme. Ne fare mirë mund të ishim përballë një dyndje siç ishin vendet e tjera, Maqedonia para se të bëhej e veriut, Serbia, Kroacia, Sllovenia u përballën me flukse të jashtëzakonshem në dyndjen e madhe të 2015. Ne nuk u përballëm sepse nuk ishim në rrugën ballkanike.
Marrëveshja për emimigrantët, e firmosur më 6 nëntor nga kryeministri i Shqipërisë, Edi Rama, dhe kryeministrja e Italisë, Giorgia Meloni, është parë me shqetësim nga ekspertët e çështjeve të migracionit dhe sigurisë në Tiranë. Opozita shqiptare e ka kundërshtuar dhe ka kërkuar interpelancë urgjente me Ramën. Partia Demokratike ka paralajmëruar se pas hyrjes në fuqi të marrëveshjes, do t’i drejtohet Gjykatës Kushtetuese të vendit në lidhje me të.
Me marrëveshjen e nënshkruar në Shëngjin, emigrantët që do të shpëtohen në Detin Mesdhe, do të strehohen në Shqipëri, ndërsa Italia do të financojë për ngritjen e qendrave për pritjen e tyre. Zbatimi i saj pritet të nisë pranverën e vitit të ardhshëm. Sipas protokollit të publikuar nga Qeveria shqiptare, Italia do të depozitojë 16.5 milionë euro në një llogari të posaçme të Thesarit të Shqipërisë, si paradhënie për strehimin e emigrantëve.
