Agjencia e Mbikëqyrjes Policore ka pezulluar nga detyra 4 efektivë policie, pasi dyshohet se kanë shpërdoruar detyrën dhe janë përfshirë në trafik automjetesh të vjedhura në Greqi.
3 punonjës janë të pikës kufitare të Kapshticës dhe I katërti është specialist për hetimin e krimeve në Korçë. Efektivët e policisë janë Markelian Murati, Stelio Lushi, Edison Mielli dhe Mariglen Azisllari.
Në pranga ka rënë dhe 32-vjeçari Maradona Cenolli i akuzuar si autor i trafikut.
Sipas hetimeve të AMP-së ka rezultuar se Cenolli ka trafikuar në Shqipëri automjete që rezultojnë të vjedhura në Greqi, duke iu bërë ndryshime në elementët identifikuese për t’i pajisur më pas me dokumente false, me qëllim shitjen në vendin tonë.
Po kështu është arritur të dokumentohet se punonjësit e Policisë, në shpërdorim të detyrës nuk kanë kryer verifikime mbi dokumentacionet e mjeteve ndërkohë që ka dyshime se kanë përfituar shuma parash nga i riu.
Ndaj Maradona Cenollit gjykata ka vendosur masën e sigurisë “Arrest në burg” si i dyshuar për kryerjen e veprës penale “Trafikimi i mjeteve motorike”.
Ndërkohë janë sekuestruar 6 automjete të dyshuara të vjedhura, me vlerë 130.000 euro.
