Situata është tensionuar përpara Kryeministrisë në Tiranë, ku forcat e Policisë së Shtetit kanë nisur shoqërimin e protestuesve, në ditën e 13-të të revoltës studentore kundër qeverisë së Edi Ramës.
Ndërhyrja e efektivëve vjen pas përpjekjeve të policisë për të shpërndarë pjesëmarrësit në tubim, ndërsa tensionet mes demonstruesve dhe forcave të rendit vijojnë.
Sipas raportimeve nga vendngjarja, policia ka nisur shoqërimin e disa protestuesve, ndërsa ende nuk ka një bilanc zyrtar për numrin e personave të ndaluar apo arsyet e shoqërimit të tyre. Ndërkohë një numër i shumtë qytetarësh që po protestonin paqësisht iu kthyen policisë për veprimin e padrejtë. Turma u shpërnda duke u larguar nga bulevardi para Kryeministrisë.
Në terren ka ndërhyrë edhe autoboti me ujë, ndërsa raportohet për shoqërime të protestuesve nga efektivët.
Gjatë tensioneve, një i ri është shpëtuar nga bashkëmoshatarët e tij, të cilët kanë ndërhyrë për të mos lejuar shoqërimin e tij nga policia.
