Fermerët shqiptarë janë ngritur këtë të enjte në protestë. Ata janë mbledhur para Ministrisë së Bujqësisë dhe Zhvillimit Rural ku kanë parashtruar kërkesat e tyre. Po ashtu ata kanë paralajmëruar përshkallëzim të protestave nëse kërkesat e tyre nuk marrin zgjidhje. Ata deklaruan se protesta e tyre do të shtrihet në të gjithë vendin.
Muaj shkurt sipas tyre do të jetë një muaj protestash për të drejtat e fermërëve. Protesta pritet të nisë në Korçë, e më pas do të kulmojë në Tiranë në ditët e para të marsit.
Çfarë kërkojnë fermerët:
· Barazimi i TVSH për produktet bujqësore
· Rimbursim për çdo litër qumësht
· Naftë pa taksa për mjetet bujqësore
· Fatura TVSH me çmim real nga pika e grumbullimit në ditën e dorëzimit të produktit
· Subvencionim për farat dhe fidanët
· Subvencionim për produktet organike.
Fermeri: Punojmë me djersën e ballit, jo në ato serat që i kanë marrë klientët e tyre. Se i njohim shumë mirë kush i ka bërë serat e IPARD-it. S’kanë asnjë lidhje me bujqësinë.
Kërkesat e tyre janë të njëjta me ata të fermerëve të tjerë në Europë, të cilët prej javësh janë në rrugë, në shenjë proteste. Ata kanë bllokuar rrugët, autostradat dhe madje selinë e ‘’Qeverisë’’ së Bashkimit Europian në Bruksel. Greqia, Italia, Franca dhe Belgjika janë në kaos, pasi fermerët kanë paralajmëruar vijimin e protestave derisa sipas tyre, e drejta që ata kanë të triumfojë.
Protestat e fermerëve në Shqipëri
Fermerët, ndonëse më të qetë se sa ata në Bashkimin Europian kanë protestuar për të drejtat e tyre. Kështu rreth një javë më parë fermerët e Korçës protestuan pasi mollët e tyre kishin mbetur stok. Ata bllokuan aksin Korçë-Pogradec ndërsa u shprehen se shkak për këtë situatë është bërë konkurenca nga importi.
Ata thanë se mollët e ardhura kryesisht nga Serbia, Maqedonia e Veriut dhe Greqia dalin në treg me çmim më të ulët për shkak të politikave mbështetëse që kanë vendet e rajonit për fermerët.
Ndërkohë nga Ministria e Bujqësisë nuk ka ende një reagim, ndërsa mbetet e paqartë se si do të vijojë protesta e fermerëve shqiptarë. A do të frymëzohen ata nga kolegët e Bashkimit Europian dhe do të intensifikojnë protestën e tyre? Kjo mbetet për t’u parë.
