Moderatorja Megi Pojani ka ndarë me publikun një rast ku ajo është ndjerë e ngacmuar seksualisht nga një pronar televizioni. Në podkastin “MeKast” të cilin e bashkëmoderon me motrat e saj, ajo është treguar e hapur në lidhje me eksperiencat e saj me meshkujt në ambientet e punës.
Megi vuri në dukje faktin se i pëlqen të punojë më shumë me gjininë e kundërt sesa me gratë dhe vajzat, pasi ata japin më shumë energji pozitive dhe dinë të kontrollojnë stresin në punë. Megi tregon se shpesh meshkujt që e rrethonin në punë i kanë bërë komplimente por ajo nuk i ka marrë si ngacmime përveç një rasti të cilin e ndan nga të tjerët.
“Më shkruan në Instagram pronari i një televizioni dhe ai është emër shumë i njohur. Më tha se stafi vdes për ty dhe intervista i pëlqeu shumë dhe se donte të më takonte.” tha Megi.
Me ftesat e shumta për darkë Megi shprehet se vendosi ta takojë për drekë në një restorant dhe ajo që e kishte habitur ishte fakti se personi në fjalë i kishte kërkuar një takim në një restorant pa shumë njerëz. Sipas saj takimi nisi çuditshëm me pronarin e televizionit që i tregonte rreth parave të tij dhe pasurisë që posedonte.
“Ishte takimi më i çuditshëm në jetë. Kulmi ishte kur më pyeti në mënyrë të pakontrollueshme për motrat duke më ofruar mundësi pune për to. Ai po bënte premtime të jashtëzakonshme dhe ishte ofertë tunduese. Ne po hanim drekë dhe ai thonte: a do hamë darkë sot? Ishte shumë tendencioz dhe i pështirë me mimikat që bënte.” shtoi ajo.
Pojani gjithashtu tregoi se menjëherë pas darkës personi në fjalë i dërgoi një mesazh të gjatë ku i shprehte se sa mirë kishin kaluar së bashku, por ajo vendosi të mos i kthejë përgjigje sepse tashmë e kishte kuptuar qëllimin e tij.
“Më shkruajti sërish dhe më tha: sa inat që po më vjen, sa do doja të ishim bashkë për darkë, mjafton vetëm të më thuash dhe unë vij” përfundon Megi.
