Një prej çiklistëve që mbeti i plagosur në aksidentin e regjistruar në Kuç-Qeparo është nisur me helikopter drejt Traumës pasi gjendja e tij shëndetësore është rënduar.
Ngjarja ndodhi pasditen e sotme ku tre çiklistët humbën kontrollin e biçikletës gjatë garës së etapës së katërt të Turit të 81-të Çiklistik të Shqipërisë, dhe dolën nga rruga. Si pasojë të tre mbetën të plagosur dhe u dërguan në spital për ndihmë mjekësore, por njëri prej tyre mësohet se ndodhet në gjendje të rëndë dhe është nisur drejt Traumës, ndërsa dy çiklistët e tjerë po marrin mjekim në spitalin e Vlorës.
Mësohet se dy prej çiklistëve të plagosur janë shtetas grek, ndërsa tjetri është shtetas holandez. Paraprakisht dyshohet se incidenti ka ndodhur për shkak të sinjalistikës në një kthesë të fortë në Qeparo. Sakaq policia ka nisur hetimet për zbardhjen e plotë të rrethanave të ngjarjes.
