Një automjet është përfshirë plotësisht nga flakët këtë pasdite pranë kthesës së Picarit, në Gjirokastër.
Sipas njoftimit të Drejtorisë së MZSH-së Gjirokastër, shërbimi zjarrfikës u njoftua në orën 15:06 nga Policia për një automjet që po digjej në këtë zonë. Menjëherë drejt vendngjarjes u nis një automjet zjarrfikës me grupin e ndërhyrjes.
Me mbërritjen në vendngjarje, zjarrfikësit konstatuan se bëhej fjalë për një autoveturë tip Toyota Auris, me motor nafte, e cila ishte përfshirë e gjitha nga flakët.
Grupi i ndërhyrjes veproi menjëherë me ujë dhe shkumë, duke bërë të mundur shuarjen e zjarrit dhe parandalimin e përhapjes së tij.
Pavarësisht ndërhyrjes së shpejtë, automjeti u dëmtua plotësisht nga zjarri. Fatmirësisht, nuk pati persona të lënduar.
Shkaqet e rënies së zjarrit mbeten për t’u përcaktuar.
