Ditën e sotme banorët e Roskovecit, të fshatit Suk 1 kanë dorëzuar sot në SPAK një kallëzim penal për të ndaluar ndërtimin e termocentralit me gaz. Ky kallëzim vjen pasi banorët shprehen se ky termocentral do të dëmtojë shëndetësine e popullsisë dhe do të shpopullojë fshatin e tyre.
Këtij kallëzimi i është bashkuar një anëtare e këshillit bashkiak të Roskovecit, Dhurata Malka. Bëhet me dije se kallëzimi i dorëzuar në SPAK është edhe ndaj kryebashkiakes Rajmonda Bufi dhe një grupi zyrtarësh të Agjencisë Rajonale të Mjedisit në Fier, Gjirokastër dhe Vlorë si dhe të shoqërisë “Fier Thermoelektrik”.
Malka ka mbajtur një deklaratë para mediave ku u shpreh se shpresojnë që kjo prokurori do të marrë vendimet e duhura do të jetë në mbështetjen e tyre si dhe të ndalojnë zbatimin e këtij projekti. Ajo më tej shtoi se ky projekt po bëhet në zemrën e hambarit të Myzeqesë, hambarit të të gjithë Evropës. Malka tha se beson se kjo prokurori do ti marrë në konsideratë shqetësimin e tyre madhor, do ta këshillojnë kryeministrin ta bëjë Toskanën e premtuar në Roskovec dhe termocentralin për ta shpopulluar.
“Unë jam Dhurata Malka, anëtare e Këshillit Bashkiak në bashkinë e Roskovecit dhe njëkohësisht edhe banore e zonës. Siç na shihni, ne u takuam sërish me ju për herë të pestë për një çështje që shpresuam shumë se do të na zgjidhej atje në bashkinë tonë në Roskovec, në fshatin tonë të bukur Suk 1, por me keqardhje ju them se kjo nuk ndodhi.
Nuk ndodhi sepse ne kemi një kryetare bashkie që nuk mbron interesat e qytetarëve të saj. me sa duket, ajo është bërë palë me kryeministrin dhe dy firmat shfrytëzuese dhe kanë dëshirë t’ua mohojnë lirinë dhe të drejtat afro 33 mijë banorëve të bashkisë së Roskovecit, të këtyre njerëzve punëtorë dhe duarartë.
Sot ne jemi shumë këtu, shumëfishi i këtyre që shihni na përcollën për tek ky institucion, te dyert e kësja drejtësie, ndaj ne shpresojmë që kjo prokurori do të marrë vendimet e duhura do të jetë në mbështetjen tonë dhe do të ndalojë zbatimin e këtij projekti në zemrën e hambarit të Myzeqesë, hambarit të të gjithë Evropës, me besim se kjo prokurori do të na marrë në konsideratë shqetësimin tonë madhor, do ta këshillojë kryeministrin ta bëjë Toskanën e premtuar në Roskovec dhe termocentralin për ta shpopulluar,” tha ajo.
