Zgjedhjet në universitete nuk pritet të kenë surpriza. Në 14 institucionet publike pjesa më e madhe e drejtuesve rikandidojnë ose nuk kanë kundërshtarë. Edhe në Universitetin “Eqrem Çabej” në Gjirokastër ka vetëm një kandidat për rektor, Jaho Cana.
Ai ka përmbyllur takimet me kolegët pedagogë dhe me studentët, të cilëve iu ka shpjeguar platformën e tij se si do të drejtojë universitetin. Cana thotë se ky universitet duhet të mbetet një institucion arsimor elitar në jug të vendit dhe të adresojë sfidat e kohës.
Jaho Cana ka përfunduar studimet e larta në programin Histori Gjeografi në vitin 1987 në Universitetin “Eqrem Çabej” dhe më pas vijoi karrierën akademike me kualifikime të ndryshme. Në vitin 2022 fitoi titullin akademik “Profesor”. Universiteti “Eqrem Çabej” vuan vitet e fundit numrin e ulët të studentëve për shkak të ndryshimeve drastike demografike. Drejtuesit e rinj të universiteteve do të zgjidhen më datë 21 qershor. ©Argjiroja.net