Në merkaton e verës, Luftëtari bëri një goditje të minutave të fundit për repartin e sulmit, talentin shqiptar Vasil Shkurtaj, ndërsa uruguajani Nunez, i afruar me bujë u mendua se do të plotësonte boshllëkun e lënë nga Reginaldo. Ndryshe nga një sezon më parë, çdo javë që kalon po konfirmon mungesën e shënjestrës së klubit nga “Qyteti i Gurtë” pasi afrimet e verës nuk kanë bindur dhe tashmë problemi më i madh është qëndra e sulmit ku mungon lojtari gol.
27-vjeçarin nga Mozambiku, Reginaldo Faife që rezultoi arma fatale për bluzinjtë në shumë ndeshje është emri që mungon më shumë në këtë grup që nuk arrin ta çojë topin në rrjetë. Nunez tashmë i larguar për shkak të paraqitjeve të dobëta, ndërsa Shkurtaj me shumë mundësi do të federohet vetëm në muajin janar. Në këtë mënyrë, trajneri Hasan Lika ka mbi supe barrën e rëndë për të gjetur një emër që premton gola të paktën deri në merkaton e dimrit.
Abazaj dhe Bregu nuk arrijnë të çajnë mbrojtjet kundërshtare edhe pse nuk mungojnë në volum dhe raste por tensioni që po shoqëron skuadrën gjatë javëve të fundit dhe mungesa e një qëndërsulmuesi duket se po i shpërfytyron edhe dy emrat më të lakuar të Luftëtarit. Në sfidën e fundit kundër Kukësit, skuadra gjirokastrite prodhoi jo pak, madje u ndal edhe dy herë nga shtylla, por aktivizimi i Rocës në majën e sulmit duket se rezultoi një lëvizje e gabuar, por gjithsesi e diktuar nga rrethanat.
Tashmë radhën e ka Skënderbeu. Në transfertën korçare, bluzinjtë kanë një test shumë të vështirë dhe praktikisht të vështirë për t’u kaluar. E vetmja pikë ku Luftëtari mund të besojë verbërisht është trajneri Lika. Një njohës i vjetër i futbollit shqiptar që po punon prej më shumë se 10 ditësh me një grup të transformuar. Deri në merkaton e dimrit, trajneri kryeqytetas është i detyruar të marrë maksimumin nga ky grup edhe pse misionin mbijetesë këtë sezon duket shumë më i vështirë.
