Turistët në Sarandë duket se po shpenzojnë më pak krahasuar me një vit më parë. Kështu tha gazetarja e Euronews Albania, Anxhela Lushkaj, për “Now me Erla Mëhillin”.
Ajo gjithashtu tha se për korrikun ka një rënie të numrit të turistëve, të cilët janë 40% më pak se vitin e shkuar, ndërsa shtoi se tashmë operatorët turistik i kanë sytë nga italianët dhe shqiptarët e diasporës, këta të fundit janë edhe turistët që shpenzojnë më shumë para.
“Këtë vit duke u ndalur te muaji korrik, 15 ditëshi i parë i ka lënë pak në shok operatorët turistik. Nuk ka prenotime. Prenotimet në këtë periudhë janë 40% më pak se një vit më parë. Flasim për periudhën 1-15 korrik, si rezervimet dhe prezenca turistike është më e pakët. Një pjesë e mirë e hotelierëve dhe operatorëve turistik i kanë sytë nga italianët. Italianët janë të njohur për muajin gusht, pasi në Sarandë janë ata që dominojnë.
Këtë vit pritet që të fillojnë nga 15-30 korriku. Kështu që një pjesë i kanë sytë nga italianët e një pjesë tjetër e operatorëve i kanë sytë nga shqiptarët e diasporës pasi ata edhe shpenzojnë më shumë. Më tepër se për mungesën e turistëve operatorët turistik janë të shqetësuar se turistët që po vijnë nuk po zhpenzojnë para. Këtë vit kemi më shumë turistë të pavarur që i përkasin moshave të reja të cilët preferojnë plazhe të virgjëra, marrin ushqime në supermarket dhe qëndrojnë në airbnb”,-tha gazetarja./Euronews Albania
